Naýryz merekesin Reseıdiń Qostanaı oblysymen irgeles jatqan Chelıabi oblysyndaǵy qandastarymyz da dúrildetip atap ótti. Chelıabi qalasynyń ortalyǵyndaǵy «ChTZ» teatrynyń atshaptyrym foıesinde Naýryz merekesine arnalǵan kórme ótti. Oǵan Chelıabi oblysynda turyp jatqan túrki halyqtarynyń ókilderimen birge Naǵaıbaq, Agapov, Chesma aýdandary men Plast qalasy sekildi on alty mýnısıpaldy aýdandary men qalalarynan qandastarymyz kelip qatysyp, halqymyzdyń dástúr-saltyn, ónerin kórsetti.
Naýryzdy ótkizýdi Chelıabi oblystyq Halyqtar dostyǵy úıi uıymdastyrypty, oǵan «Jaqsylyq» qazaq ulttyq-mádenı qoǵamdyq birlestigi de atsalysty.
«Biz oblysta turatyn 40 myń qaraly qandastarymyzdyń ana tilimiz ben ulttyq dástúrlerimizdi umytpaýy, ógeısimeýi úshin jyl boıyna jumys júrgizemiz. Bul oraıda festıvalder men túrli baıqaýlardyń alatyn orny erekshe, jarys sıpatynda ótkizgen sharalar ulttyq namysty qamshylaýǵa yqpal etedi, alysta otyrǵan aǵaıyndy ulttyq qundylyqtarǵa qulshyndyrady» deıdi «Jaqsylyq» qazaq ulttyq-mádenı qoǵamdyq birlestiginiń jetekshisi Iýlıt Baıdáýletova.
Qostanaı oblystyq ákimshiligi Chelıabi oblysymen ekonomıkalyq jáne mádenı baılanystar ornatqan. Oblystyq Tilderdi damytý basqarmasynyń Til úıretý ortalyǵy reseılik qazaqtar úshin jyl saıyn qazaq tilin oqytý baǵdarlamasyn jasap beredi, muǵalimderge arnap semınar ótkizedi.
«Chelıabi oblysyn jaılaǵan aǵaıyndarymyz bizdiń mamandar jasaǵan baǵdarlamamen birneshe jyl qatarynan ana tilin úırenip keledi. Maqtanǵanymyz emes, tildik ortadan shet júrgen aǵaıynǵa yqshamdalǵan, mundaı jeńildetilgen baǵdarlama jasap berip, onymen syrttaǵy qazaqtardyń til úırenýin qadaǵalap, qoǵamdyq negizde til úıretýmen aınalysatyn muǵalimder úshin semınarlar ótkizip, olardyń biliktiligin kóterip otyrǵan jumystar bizdiń oblystyq Tilderdi damytý basqarmasynda júrgiziledi. Mundaı baǵdarlamany bizdiń oblystaǵy Til úıretý ortalyǵynyń mamandary ǵana jasady, onyń respýblıkanyń basqa oblystarynda balamasy joq» deıdi Qostanaı oblystyq Tilderdi damytý basqarmasynyń bólim meńgerýshisi Baqytgúl Súleımenova.
Chelıabide ótken Naýryz merekesine bashqurt, tatar, azerbaıjan sekildi halyqtarmen qatar qazaqtar da belsene qatysady eken. Olar ákelgen ulttyq taǵamnyń túr-túri ózgelerdiń de nazaryn aýdardy, ónerge jastardy baýlyp otyr.
Naýryz merekesi Chelıabi oblysyndaǵy qazaqtar shoǵyrlanyp otyrǵan aýdandardaǵy eldi mekenderde de ótkizildi. Troısk aýdanyndaǵy Sanarka selosyndaǵy 500 úıdiń 50 tútini qazaqtar. Olar bıyl Naýryz meıramyn ótkizdi. Oǵan qandastarymyz Troısk, Chesma aýdandary men Plast qalasynan kelip, halyqtyń dástúri men ónerin kórsetti. Osy merekeni uıymdastyrǵan Sanarka aýylynyń aqsaqaly, «Murager» qazaq ulttyq-mádenı ortalyǵynyń jetekshisi Dıqan Mýsın jastarǵa, balalarǵa ana tilin, halqymyzdyń ónerin jalyqpaı úıretýmen keledi.
«Mektep oqýshylaryna dombyra, án úıretemin. Sol arqyly qazaq tiline yqylasy oıanady. Biraq sońǵy ýaqytta bala sany azaıyp ketti, jastar seloda qalmaıdy. Osy seloda buryn men qazaq balasynyń barlyǵyna dombyra ustaýdy úıretken edim, olar ony óskende de umytpaıdy. Sosyn aralas-quralas turyp jatqan ózge ult ókilderine qazaq ánderin úıretemin» deıdi Dıqan aǵaı. Naýryz merekesinde Sanarka selosynyń turǵyndary –orystar, ýkraındar, tatarlar men bashqurttar qazaq ánderin shyrqady.
Jalpy bıylǵy Naýryz merekelerine oblystyń 16 aýdany men qalasynda turyp jatqan qazaq aǵaıyndar atsalysty.
Názıra Járimbet
«Egemen Qazaqstan»
Chelıabi-Troısk-Qostanaı