«Qyzyl kitapqa» engen, aıyryqsha qorǵaýdy qajet etetin qyzǵaldaq – Ońtústik Qazaqstan oblysynyń sımvoly. Sol alqyzyl qyzǵaldaqtyń eń ádemileri Túlkibas aýdanyndaǵy Aqsý-Jabaǵylyda jáne Shubaıqyzylda kóptep ósedi. Kóktemgi tamasha kórinisti qyzyqtaýǵa elimizdiń jáne alys-jaqyn sheteldik qonaqtardyń múmkindigi molaıa túspek. Iаǵnı, endi Ońtústikte jyl saıyn sáýir aıynda «Qyzǵaldaq festıvalin» ótkizý qolǵa alynady.
Jalpy oblysta Elbasynyń «Bolashaqqa baǵdar: rýhanı jańǵyrý» baǵdarlamasy aıasynda kóptegen respýblıkalyq jáne halyqaralyq jańa jobalardy júzege asyrý josparlanyp otyr. Ár aýdanda ótkiziletin sharalarda óńirdiń áleýeti men ereksheligi eskerilmek. Mysaly, qyzǵaldaq festıvalinen keıin mamyr aıynda «Ordabasyǵa oralý: Bereke basy – birlik» taqyryptarynda úlken is-shara ótkiziledi. Sondaı-aq, jyl saıyn «Týǵan jerge taǵzym: Ordabasy kóktemi» atty jastar forýmy dástúrli túrde uıymdastyrylmaq. О́ńirdegi mektep bitirgen túlekterdi jańa ómirge Ordabasy taýynan attandyrý dástúri qolǵa alynady.
Bıylǵy jyly «Qymyzmuryndyq» is-sharasyn Báıdibek aýdanynyń taý baýraıynda ótkizý josparlanyp otyr. «Ońtústiktiń dara tulǵalary» taqyryby aıasynda aı saıyn elge tanymal zııaly qaýym, ǵalym, qoǵam, memleket qaıratkerleri jastarǵa dáris oqıtyn bolady. KSRO Sýretshiler odaǵynyń 12 múshesi Tólebı aýdanyndaǵy Qasqasý aýylynan shyqqan. Osyǵan oraı, Tólebı aýdanynda halyqaralyq, respýblıkalyq dárejedegi sýretshiler men músinshilerdiń zamanaýı óner bıenallesin ótkizý josparlanýda. Budan bólek, oblystyń týrıstik áleýetin damytý maqsatynda qazan aıynda jyl saıyn «Safari Shardara» sharasy bastalady. Qyzylqum óńirinde, Syrdarııa ózeniniń boıynda, Shardara teńiziniń jaǵalaýlarynda seıil-serýen, safarı, sý jarystary, kúzgi djaz, gıtara festıvalderin uıymdastyryp, ólkemizdi Qazaqstannyń turǵyndary men sheteldikterge tanystyrý kózdelip otyr. Tamyz aıynda «Qaýyn fest» al, qyrkúıek aıynda «Agro fest» festıvalin ótkizý de jyl saıynǵy dástúrge aınalmaq.
Sporttyq jarystar ótkizý de buqaralyq sıpat alady. Mysaly, Tólebı aýdanynda «Qasqasýǵa qar tústi», «Qasqasý qysy», «Qasqasý men Birkólik arasyndaǵy shańǵy shattyǵy» baıqaýy, «Taý samaly – jan samaly» is-sharalaryn ótkizý josparlanýda. Qys aılarynda «Salbýryn – saıatshylyq merekesi» men «Qansonarda búrkitshi shyǵady ańǵa» atty is-sharalar jas urpaq boıyna babalar saltyn sińirip, saıatshylyqty, ulttyq sport túrlerin nasıhattaýǵa septigin tıgizbek. Al Saryaǵash aýdanynda jyl saıyn «Open Saryagash» atty halyqaralyq, respýblıkalyq deńgeılerde golf jarystary ótkiziledi.
Ǵalymjan ELShIBAI,
«Egemen Qazaqstan»
Sýretterdi túsirgen Áıgerim Begimbet