M.Qozybaev atyndaǵy Soltústik Qazaqstan memlekettik ýnıversıteti óńirdegi birden-bir joǵary oqý orny sanalady. Onyń qabyrǵasynan qanat qaqqan myńdaǵan túlekter elimizdiń ár qıyrynda jemisti eńbek etip júr. Alaıda sońǵy kezeńde osynda oqıtyn stýdentterdiń sany 10 myńnan 3,5 myńǵa deıin kemip, eńsesi túsip ketken bolatyn.
Onyń árqıly sebepterine toqtalmaı-aq qoıaıyq, eń bastysy, oryn alǵan olqylyqtardy túzetýge jańa basshylyqtyń bilek sybana kiriskenin jaqsylyqtyń jarshysyna balaǵanymyz jón shyǵar. Byltyr tegin bilim alýǵa tilek bildirgenderdiń 30 paıyzy grantqa qabyldandy. 2015 jyly bul kórsetkish 13 paıyz tóńireginde bolǵanyn eskersek, sóz joq, ilgerileý bar. Qazir munda bilim alyp jatqan stýdentterdiń úshten biri memleket qarajaty esebinen oqıdy. 48 baǵyt boıynsha mamandar daıarlanady. Alda 23 bakalavrıat mamandyǵy qosylady.
– Prezıdent Úndeýiniń úshinshi bastamasynda stýdentterdiń bilim alýynyń qoljetimdiligi men oqý sapasyna erekshe nazar aýdarylǵan. Ol úshin kóptegen áleýmettik múmkindikter týdyrylatyny atap aıtylǵan. Biz de stýdent jastardy jaıly jataqhanalarmen qamtamasyz etýdiń joldaryn qarastyryp otyrmyz, – degen edi ýnıversıtet rektory Serik О́mirbaev «Prezıdenttiń bes bastamasy» úndeýi talqylanǵan aktıv jıynynda.
Araǵa kúnder salyp oqý ornynyń prorektory Erbol Isaqaevpen habarlasqanymyzda, myń oryndy jataqhana salý maqsatymen eki nusqa ázirlengenin, budan ózge de áleýmettik qamqorlyqtar jasalatynyn jetkizdi. Birinshi nusqa boıynsha 5 qabatty eki jataqhana turǵyzý oılastyrylǵan. Ekinshisinde 12-14 qabatty záýlim ǵımarat salý qarastyrylǵan. Tıimdi degeni tańdap alynady. Jańa nysannyń bólmeleri jaıly páterlerge uqsatyp salynady. Ashana, dýsh jumys isteıdi. Budan bólek jattyǵý zaly, kir jýatyn bólme ornalasady, dedi ol. Búgingi kúni úsh jataqhanada 1026 stýdent turady. Kezekti sarǵaıa kútýshilerdiń qatary qalyń. Qalǵandary baspana jaldaýǵa májbúr. Jaldaý baǵasy qymbat ári qala shetinen qatynaıtyndyqtan túrli qolbaılaý týdyratyny anyq.
Sol sııaqty ýnıversıtet bazasy negizinde alǵash ret medısına mamandyǵyna talapkerler qabyldanyp, aýyl sharýashylyǵy kafedrasy qurylady. Jýyrda ýnıversıtet rektory grantyna arnalǵan baıqaýdyń sheshýshi kezeńi ótti. 130 úmitkerdiń arasynan eń úzdikteri iriktelip alyndy. Jeńimpazdar tórt jyl boıy tegin oqý múmkindigin ıelense, ekinshi oryn alǵandarǵa – 50, úshinshi oryn alǵandarǵa 25 paıyzdyq jeńildik beriledi. О́ńirde muǵalimder jetispeıtindikten matematıka, bıologııa, geografııa, pedagogıka jáne bastaýysh oqý ádistemesi sııaqty mamandyqtarǵa basymdyq berilgen. Qazir «Serpin» baǵdarlamasy aıasynda 800-deı jas bilim alýda. Bul baǵytta da aýqymdy sharalar jalǵasyn tappaq.
Ýnıversıtet basshylyǵynyń aıtýynsha, 2020 jylǵa taman stýdentterdiń sanyn 8 myńǵa deıin jetkizý mejelengen.
О́mir ESQALI, «Egemen Qazaqstan»
Soltústik Qazaqstan oblysy