Oblys ortalyǵynda ulttyq naqysh órnekterimen erekshelenetin mýltıbrendtik «QazО́ner» ortalyǵy ashyldy. Saýda ornynyń ashylýyna ánshi Roza Álqoja qatysty. Elimizdiń 100 brendi qatarynan oryn alǵan «Men syıǵa tartqan oramal» saýda belgisiniń buıymdary «Halyq markasy» tutyný belgisine de ıe.
Iá, qazaq «oramal ton bolmaıdy, jol bolady» dep yrymdaıdy. Ánshi Roza Álqoja qalyptastyrǵan brend – «Men syıǵa tartqan oramaldyń» oıýmen órnektelgen oramaldaryn, «Mádenı mura» ortalyǵy jasaǵan bylǵary qol sómkeler men ámııandardy, «Kerbez» fırmasynyń saǵattaryn, «Merhat» zergerlik sheberhanasynyń kúmis syrǵa-saqınalaryn endi bir jerden – «QazО́nerden» satyp alýǵa bolady.
– Qazir oramaldarǵa suranys ta az emes. Soltústik óńirlerde oramal taǵatyn qyz-kelinshekterdiń kóbeıip kele jatqany qýantady. Analarymyzdyń basynan aq jaýlyq túspegen ǵoı. Alǵash ret «Men syıǵa tartqan oramal» dúkeni Almatyda ashyldy. Qazaqtyń da brendtik buıymy bolsyn dep, «Álqoja» degen atpen oramaldar shyǵarýdy qolǵa aldyq. Endi mine, Pavlodarda 20-shy dúken esik ashyp otyr. Bul oramaldar ulttyq naqyshta órnektelgen. Qytaıdan, Koreıadan jetkizilgen matalar ózimizdiń sehta boıalady, sheti kómkeriledi, monshaqtar taǵylady. Biz tigetin ártúrli tústi oramaldar áıelderge, qyz-kelinshekter, apalarǵa unaıdy dep oılaımyz, – deıdi ánshi.
Jergilikti jas kásipker Áset Seıitahmettiń aıtýynsha, ulttyq naqyshtaǵy buıymdarǵa qazir suranys joǵary. Endigi maqsat – qazir zamanaýı úlgide kıinsek te ulttyq bolmysymyzdy aıqyndaıtyn kıimderdi, buıymdardy qoljetimdi etý. Sondyqtan ánshi Roza Álqojaǵa jasalǵan ulttyq buıymdardy bir jerge biriktirý týraly usynys qoldaý tapty.
– Roza qyzymyzǵa óte rızamyz. Oryndaıtyn ánderi de sondaı áserli, ár júrekten oryn alady. Kereký óńirine kóktem, kúz aılarynda kelip, bizge jaqsy ánder syılaıdy. О́zim de, ansambldiń músheleri de endi ylǵı da «Men syıǵa tartqan oramaldyń» buıymdaryn, kúmisterin satyp almaqpyz, – deıdi oblys ortalyǵyndaǵy «Saǵym jyldar» ájeler ansambliniń jetekshisi Baqytjamal apa. – Biz qazaq áıelderi qonaqqa bara qalsaq ta, týǵan kún, merekelerge syı-sııapatqa oramal satyp alamyz. Kelin bolyp túsken kezde basyna oramal jaýyp, áýlettiń amanaty tapsyrylady. Oramal taǵý – áıelge paryz. Sondyqtan oramaldy qasterleı bileıik.
Farıda Byqaı, «Egemen Qazaqstan»
PAVLODAR
Sýretti túsirgen Darhan О́mirzaq