Osy aptada fýtboldan ulttyq quramalardyń birneshe joldastyq kezdesýleri ótti. Brazılııa Germanııany jeńip, álem chempıonatynda ketken esesin qaıtarǵandaı boldy.
Jazda ótetin Reseıdegi chempıonattyń basty favorıtteriniń biri – Belgııa Saýd Arabııa quramasyn 4:0 esebimen oısyrata utty. Al jarysty qabyldaıtyn Reseı taǵy bir myqty – Fransııa quramasyna óz alańynda 1:3 esebimen jeńildi. Eń qyzyǵy Leonel Messıdiń Argentınasy Ispanııadan ońbaı utyldy. Esep 6:1.
Osydan bir apta buryn Leonel Messı ıspan gazetterine suhbat bergen-di. «2018 jylǵy álem chempıonaty – men úshin sońǵy múmkindik. Odan keıin quramada oınaýym ekitalaı. Qazir ózimniń babymda júrmin, mýndıalda jeńiske jetýimiz Argentına quramasynyń ózge de fýtbolshylary qazir jarqyrap júr» dep aǵynan jarylǵan edi. Iá, rasymen de «Manchester Sıtı» sapyndaǵy Serhıo Agýero da, «PSJ» sapyndaǵy Dı Marııa da naǵyz babynda. «Iýventýstegi» Gonsalo Igýaın men «Interdegi» Ikardıdiń ózi nege turady?! Olar ár týr saıyn gol soǵyp, kózge túsip júr. Fýtbol mamandary da Argentına Reseıdegi chempıonatta jeńiske jetýi múmkin dep topshylaǵan. Alaıda...
Alaıda, Argentına quramasyndaǵy oıynshylardyń barlyǵy da keremet emes eken. Qorǵanystyń álsizdigi, ortalyq jartylaı qorǵaýshylardyń sylbyrlyǵy «albıseleste» quramasynyń osal jerlerin kórsetti. Oǵan biz kúni keshe ótken Ispanııa – Argentına matchynda kóz jetkizdik. Bas bapker Horhe Sampaolı Leodan basqa ataqty fýtbolshylaryn tegis alańǵa shyǵardy. Messıdiń sanyndaǵy jaraqat ýshyǵyp ketpesin dep, bapkerler ony oıynǵa qatystyrmady. tórt dúrkin «Altyn doptyń» ıegeri oıyndy «Santıago Bernabeýdiń» trıbýnasynda otyryp tamashalady. Negizinen Ispanııanyń oıynyn tamashalady desek artyq emes. Sebebi Argentına bul matchta qaqpasynan dop alýmen boldy. Matchtyń nebári 12-mınýtynda Ispanııa iske kirisip, Dıego Kosta oıynnyń esebin ashty. Kosta bastaǵan isti ári qaraı Isko ilip áketti. «Real» jartylaı qorǵaýshysy bul matchta het-trık jasady. Arasynda Alkantara bir márte, tipti quramaǵa endi alynyp júrgen Dıego Aspastyń ózi gol saldy. Jalpy alǵanda erinbegenniń bári Argentınaǵa gol soqty. 74-mınýtta Isko tablodaǵy kórsetkishti 6:1 jasaǵanda Leonel Messı qolyn bir siltep, trıbýnadan taıyp turdy. Oǵan deıin de Messıdiń kóńil-kúıin ańdyp otyrǵan fototilshiler ataqty argentınalyqtyń kúńirengen túr-álpetin taspaǵa túsire beripti. Sol fotolardyń basym kópshiligi ıspan gazetteriniń alǵashqy betinde jarııalandy.
Iá, rasymen de Argentınany munshama osal oınaıdy dep eshkim kútken joq. Jarty álem Leo bastaǵan quramany Álem chempıonatynyń favorıti sanap edi. Endi qalaı bolar eken? Birinshilik bastalýǵa birneshe aı qalǵanda Argentına óziniń tarıhyndaǵy eń aýyr jeńilisterdiń birin qaıtalap otyr. «Albıseleste» 1968 jyly Chehoslovakııadan, 2009 jyly Bolıvııadan 6:1 esebimen jeńilgen.
Aıtpaqshy, Krıshtıaný Ronaldý bastaǵan Portýgalııa quramasy Nıderlandy ujymyna óz alańynda 0:3 esebimen ese jiberdi.
Ermuhamed MÁÝLEN,
«Egemen Qazaqstan»