Teledıdardyń dıdaryn ashyp «kóksandyqtyń» ajaryn kirgizip jan-jaqty oılastyrǵan baǵdarlama, sol baǵdarlamany tili múdirmeı, dıdarlarynan nur tógile otyryp júrgizetin azamattarǵa táýeldi ekeni belgili. Bul jaǵynan kelgende ár habardyń qaımaǵyna aınalyp, jurttyń iltıpatyna bólengen jaqsylar az bolǵan joq. Ondaı myqtylar qazir qazaq teledıdarynyń ardagerler sanatyndaǵy sarbazdar sanalady.
Buryn radıony serik etip kelgen qazaq jurty osydan 60 jyl buryn, naqtylaı tússek 1958 jyly kóktemde ulttyq teledıdardyń tusaýy kesilip , aına betinen adamdar kórine bastady. Bul el ómirindegi keremet oqıǵa sanalǵany da málim. Sol qazaq teledıdarynyń qara shańyraǵy búginde tórt qubylasy túgel deýge turarlyq «Qazaqstan» Ulttyq arnasy ekeni belgili. Kól-kósir habarlar men nebir aıtýly baǵdarlamalar ult tarıhynyń shejiresine aınalǵany týraly ataýly 60 jylda saralanyp, mereıtoı memlekettik dárejede dúrildep ótti. Sán-saltanat kelisti boldy. Tartý-taralǵy da jetip-artyldy. Sonyń qatarynda 1958-2018 jyldar ishindegi baǵdarlamalardy baıandaǵan «Eldıdar» atty ádemi bezendirilgen, sapaly qaǵazǵa basylǵan, túrli-tústi sýrettermen kómkerilgen kitap jurt qolyna tıdi. Bul rýhanı qundylyqty qurastyrǵandar: fılologııa ǵylymdarynyń doktory, Súleımen Demırel ýnıversıtetiniń professory, telezertteýshi Qudaıbergen Tursyn men ónertaný magıstri Erjanar Ásheıhan ekenin aıta ketelik.
Efırden saǵat sanap, mınýt eseptep kórermendermen júzdesýge, tildesýge, pikirlesip syrlasýǵa jol tartqan alpys jyldaǵy aıtýly baǵdarlamalar legi týraly oı qozǵaı kelip, ony alfavıt boıynsha berýi de jaqsy áserge bóleıdi. Kitapty paraqtap otyrǵanda nebir oqıǵalar, jurtshylyqpen dıdarlasý, ult zııalylarymen áńgime dúken qurý, ádebıet pen mádenıettiń alyptarymen syr-suhbat jasaý – bári de jarasymdy berilgen.
Jyldar jyljyp, zaman ózgergen saıyn eski súrleýdiń ornyn jańa izdenister basyp jatady. Búginginiń ólshemi, erteńge bedel bolmasy da belgili. Sondyqtan da dáýirge qaraı táýir talpynbasań tasada qalyp qoıýyń kádik. Bul alǵan bıigińdi, jetken jetistigińdi kómeskilendirip jiberýi de múmkin. Sondyqtan da bolar kitaptyń betashary «qazaqtyń bas aqyny» (Á.Bókeıhan), ulttyń bary men joǵyn, ashysy men tátisin aıanbaı aıtyp, osyny túzeseń túgel bolasyń degen Abaıdaı danadan bastalypty. Ár kezderde «Abaı álemi», «Abaı – halyqtyń uly», «Abaıtaný» – osylaı jalǵasyp kete beredi. Táýelsiz eldiń baq pen baqyty týraly alýan túrli baǵdarlamalar da az bolmaǵan eken. Ásirese Ǵ.Músirepov, Á.Marǵulan, A.Mashanov, N.Tilendıev, Á.Kekilbaev, basqa da ult zııalylary jaıly berilgen aýqymdy habarlarda kótergen máseleler qamtylypty. Bir sózben aıtqanda, «Qazaqstan» Ulttyq arnasynyń ótkenin shejiredeı shertken kitaptan alar taǵylym az emes.
Súleımen MÁMET, «Egemen Qazaqstan»