Parlament depýtattary «Prezıdenttiń bes áleýmettik bastamasy» atty Úndeýinen týyndaıtyn mindetter men talaptardy túsindirý maqsatymen oblysqa kelip, ujym múshelerimen kezdesti.
Májilis depýtattary Svetlana Bychkova, Aızada Qurmanova, Aıgúl Nurkına, Jámıla Nurmanbetova, Qanat Mýsın oblystyq ishki ister departamentinde bolyp, kóshi-qon qyzmetiniń, jedel basqarý ortalyǵynyń, ýchakelik beketterdiń jumystarymen tanysty. OIID-niń basshysy, general-maıor Berik Bilálov óz sózinde 977 beınebaqylaý kamerasy jumys isteıtinin, bıyl 300 mıllıon teńgege 336 zamanaýı qurylǵy satyp alynatynyn jetkizdi. Byltyr paıdalanýǵa berilgen jataqhanaǵa 102 polısııa qyzmetkeriniń otbasylary qonystanǵan. 40 qyzmetker «Nurly jer» baǵdarlamasy arqyly qoljetimdi baspanaǵa ıe bolǵan. 300 qyzmetkerdiń páter kezeginde turǵany eskerilip, aldaǵy ýaqytta 100 páterli úı turǵyzylatyn bolady.
A.Nurkına «Prezıdenttiń bes áleýmettik bastamasy» departamentte atqarylyp jatqan sharalarǵa oń baǵa berip, birinshi baǵyttyń mańyzdylyǵyn erekshe atap kórsetti. Memleket turǵyndardy qoljetimdi baspanamen qamtamasyz etý múmkindikterin jan-jaqty qarastyryp keledi. Onyń naqty bir mysaly retinde «7-20-25» baǵdarlamasyn erekshe atap ótti. Nesıe mólsherlemesi de jeńildetildi, dedi ol. Basqa halyq qalaýlylary joǵary bilim alýdyń sapasyn arttyrýǵa, aýyldyqtardy shaǵyn jáne orta bıznes salasyna kóptep tartýǵa baılanysty irgeli ister júzege asyrylatynyn áńgimeledi.
№1 qalalyq emhananyń ujymymen ótken júzdesýde Svetlana Bychkova, Jámıla Nurmanbetova, taǵy basqalary jalaqysy tómen jumysshy-qyzmetkerlerdiń eńbekaqysyn kóbeıtý baǵytynda Úkimet tarapynan qosymsha qarjy bólinetinin aıtty.
Senator Erik Sultanov Shal aqyn aýdany turǵyndarymen kezdesip, qazaqstandyqtar úshin jaıly baspana áleýmettik mańyzy aıryqsha másele bolyp esepteletinin sóz etti. О́ńirde 20 myńǵa jýyq adam úı kezeginde tur. Salymshylardyń «Turǵynúıqurylys jınaq bankisine quıǵan qarajattary 15 mıllıard teńgeni quraıdy. Elbasynyń úndeýin shalaqyndyqtar da qyzý qoldap otyr. 15 páterlik eki úı salý úshin jobalyq-smetalyq qujattar rásimdelip, oblystyq qazynadan 200 mıllıon teńge bólingen. Men aýdandyq kitaphanada eńbek etemin. Aılyq jalaqym – 49 myń teńge. Endi biz úshin salyq júktemesi 10 ese azaıtylyp, 1 paıyzǵa deıin tómendetildi. Bul qadam bárimizdi qýantady, dedi jıynda óz oıyn bildirgen kitaphanashy Aıgúl Tasjanova.
Aýdan ákimi Nurlan Esimov byltyr jospardaǵy 90 mıllıon teńgeniń ornyna 120 mıllıon teńge jeńildikti nesıe berilgenin, bıyl bul deńgeıden tómendemeıtinin alǵa tarta kelip, shaǵyn nesıe berýdi kóbeıtý ózin-ózi eńbekpen qamtyǵandar jáne jumyssyzdar úshin tıimdi tetik sanalatynyna toqtaldy.
Parlament Májilisi men Senat depýtattarynyń kezdesýleri 5 áleýmettik bastama turǵyndardyń jaǵdaıyn jaqsartýǵa baǵyttalǵan mańyzdy shara, qolaıly tetik, qolaıly múmkindik ekenin anyq baıqatty.
О́mir ESQALI, «Egemen Qazaqstan»