Ctýdentter arasyndaǵy H respýblıkalyq mýzykalyq saıys bastaldy

Jyldaǵy dástúrge sáıkes túrli joǵa­ry oqý oryndarynan kelgen saıysqa qa­ty­sýshylardy konservatorııa rektory Jánııa Áýbákirova quttyqtaý sózimen qa­nat­tandyryp, sátti óner kórsetýge sha­qyr­dy. Qazaqstannyń halyq ártisi árbir qa­ty­sýshynyń jeńiske laıyq ekenine sendirdi. Se­bebi erekshe qabilettilerdi ǵana tańdap alatyn mýzykalyq oqý ordasynyń stýdenti ataný úshin olar mektep qabyrǵasynan bas­tap óte kóp irikteý syndarynan ótti. «Alda sizderdi, jas mýzykanttardy, qyzyqty ári óte mańyzdy synaq kútip tur. Birińizdiń baǵyńyz janyp, jeńiske jetesiz. Al ekinshińiz qundy tájirıbe jınaıtyn bolasyzdar. Keı jan­dar­ǵa osy saıys shabyt beredi. Kásibı mý­zykant retinde qalyptasyp, ári qaraı shyń­dalýǵa qulshynys syılaıdy», dedi Jánııa Áýbákirova.

Qazaqstan Respýblıkasynyń Tuńǵysh Prezıdenti – Elbasy qorynyń Almaty qala­syn­daǵy ókili Sergeı Tohtarov saıystyń shart­tary qıyn ekendigin, alaıda bul olımpıada ónerdiń, sulýlyqtyń, naǵyz talanttyń aıqyndalatyn, klassıkalyq mýzykanyń qudireti rýhanı serpilis syılaıtyn báıge bolyp qalyptasqanyna qýanatynyn jet­kizdi. «Jas saıyskerlerge bul baıqaý ne beredi? Qatysýshylardyń ózine, óz talantyna senim, ádil qazylarǵa qaıtalanbas áser, al kórermenderge Otanymyzdyń keleshek jaryq juldyzdarymen tanystyq syılaıtynyna esh kúmán keltirmeımin», deıdi S.Tohtarov.

Saltanatty kesh sońy ádettegideı konsertke ulasty. Birinshi bolyp sahnada «Halyq áni» fakýltetiniń stýdentteri óner kórsetti. Erǵalı Aıdarov, Aıdos Turar, Birjan Aıtahmetov pen Áıgerim Qul­jarasovanyń oryndaýynda keń taralǵan halyq ánderinen popýrrı oryndaldy.

Qos fortepıanonyń oryndaýyna ar­nal­ǵan fransýz kompozıtory Darıýs Mııo­nyń «Skaramýsh» atty tamasha týyn­dy­syn Dınara Toqmyrzıeva men Aınur Ábdikerovanyń dýeti kásibı deńgeıde oryndap shyqty. Jetigenshi qyzdardan quralǵan «Káýsar» toby Nurǵısa Tilendıevtiń «Aqqý» kúıimen kórermenderdi qýantty. Zalda jınalǵan qaýym Pedro Itıýraldeniń «Chardashyn» syzyltqan saksofonshylardy erekshe yqylaspen shyǵaryp aldy. Artynsha «Halyq áni» fakýlteti stýdentteriniń oryndaýynda kúı-tartys boldy.

Merekelik keshti Iаn Rýdkovskıı basqarǵan konservatorııanyń aralas hory aıaqtady. Mýzykalyq ujym halyq áni «Nazqońyrdy» oryndady. Týyndy Ǵalymjan Berekeshev pen brazılııalyq Barbatuques «Voce chegou» tobynyń ózgeshe árleýimen usynyldy.

Stýdent saıyskerlerdiń arasyndaǵy bul jarys 21 sáýirge deıin jalǵasady. Bir aıǵa jýyq ótetin mýzykalyq saıys­ta joǵary oqý oryndarynyń stýdentteri «As­pap­tyq oryndaýshylyq», «Dırıjerlik», «Án aıtý sheberligi», «Ulttyq mýzykalyq óner», «Kom­pozısııa», «Art-menedjment», «Mý­zy­kalyq bilim» sekildi jeti baǵyt boıynsha baq synasady. Bul 500 adamnyń basyn biriktirgen olımpıadanyń basty maqsaty – stýdentterdiń oqý ordasynan alǵan bilimin tájirıbe júzinde kórsetýdiń keń múmkindigin usyný, bıik deńgeıdegi báıgelerge daıyndaý, ózin-ózi kásibı shyńdaı túsýge, keleshekte myqty maman bolyp qalyptasýyna beıimdeý.

Aıgúl AHANBAIQYZY,

«Egemen Qazaqstan»

ALMATY