Bul týraly memlekettik qyzmet isteri jáne sybaılas jemqorlyqqa qarsy is-qımyl agenttigi men sybaılas jemqorlyqqa qarsy ulttyq bıýrosy departamentteriniń medısına qyzmetkerlerimen kezdesýinde málim etildi.
Jıynda densaýlyq saqtaý salasynda sybaılas jemqorlyqty boldyrmaý, aldyn alý baǵytynda keleli áńgimeler qozǵalyp, barmaq basty, kóz qystyǵa jol bergen tulǵalardyń aty atalyp, túsi tústeldi. Solardyń biri oblystyq densaýlyq saqtaý basqarmasynyń basshysy Vladımır Bezlerdiń qyzmet babyn asyra paıdalanǵany úshin qyzmetten alastatylǵany mysalǵa keltirildi.
Onyń basshy bolyp taǵaıyndalǵanyna az ǵana ýaqyt bolsa da qol astyndaǵy qyzmetkerlerden syıaqy jınap, memlekettik qyzmetshige tán emes óreskel áreketke jol bergen. Densaýlyq saqtaý basqarmasynyń jumysyna qatysty jemqorlyq táýekelderine ishki saraptama júrgizilip, № 1 qalalyq aýrýhana , oblystyq aýrýhana men oblystyq narkologııalyq dıspanser tekseristen ótken. Nátıjesinde narkologııalyq ortalyqtyń bas dárigeri jaýapkershilikke tartylǵan.
Oblysta jemqorlyq áreket boıynsha 30 qylmys áshkerelenip, 20 jaýapty tulǵa sottalǵan. Departament jetekshileriniń aıtýlarynsha sybaılas jemqorlyqqa qatysty túsetin ótinish-shaǵymdar az emes. Onyń basty sebebi sheneýnikterdiń qyzmettik ókilettikterin asyra paıdalanýyna, indetke qarsy is-sharalardyń júıeli júrgizilmeıtinine kelip tireledi. Zań buzýshylyqtarǵa jol bergen respýblıkalyq veterınarlyq zerthananyń jergilikti fılıalynyń jetekshisiniń bir mıllıon teńge aıyp tóleýine týra kelgen.
О́mir Esqalı,
«Egemen Qazaqstan»
Soltústik Qazaqstan oblysy