Aýyl turǵyndaryna yńǵaıly bolý úshin ákimshilik polısııanyń tirkeý-emtıhan bólimderiniń qyzmetkerleri «Azamattarǵa arnalǵan úkimet» memlekettik korporasııasynyń aýdandyq halyqqa qyzmet kórsetý ortalyqtarynda pılottyq tártipte jumys isteı bastady. Olar kólikti tirkeý jáne júrgizýshi kýáligin aýystyrý boıynsha qujattardy qabyldaıdy.
QR IIM-niń ákimshilik polısııasynyń TEB qyzmetkerlerin aýdandyq HQO bólimderinde ornalastyrý týraly sheshim QR Premer-Mınıstriniń orynbasary Asqar Jumaǵalıev tóraǵalyq etetin vedomstvoaralyq komıssııada qabyldandy. Memlekettik qyzmet isteri jáne sybaılas jemqorlyqqa qarsy is-qımyl agenttiginiń janyndaǵy arnaıy monıtorıngtik toby usynǵan jańa júıeniń artyqshylyǵyn alǵashqy bolyp Qaraǵandy oblysy Osakarov aýdanynyń jáne Soltústik Qazaqstan oblysy Taıynsha aýdanynyń turǵyndary baǵalaı alady. Kóp uzamaı bul joba «Azamattarǵa arnalǵan úkimettiń» taǵy 21 front-ofısinde júzege asyrylady.
Jańashyldyqtyń arqasynda avtokólik ıeleri úshin júrgizýshi kýáligin aýystyrý jáne kólikterdi tirkeý jumystary aıtarlyqtaı jeńildeıdi. Endi olarǵa oblystyq mamandandyrylǵan HQO-ǵa barý nemese ishki ister organdaryna tikeleı júginýdiń qajeti joq. Eskeretin jaıt, júrgizýshi kýáligin alǵashqy ret alýshylarǵa bul joba aıasynda qyzmet kórsetilmeıdi.
Osakarov aýdandyq №1 bólimi Osakarov aýyly Prıstansıonnaıa kóshesi, 12 úı mekenjaıy boıynsha, al Taıynsha aýdandyq bólimi Taıynsha qalasy Qazaqstan Konstıtýsııasy kóshesi 208 úı meken-jaıy boıynsha ornalasqan.
Eske sala ketsek, 2012 jyldan beri Qazaqstanda bir tereze qaǵıdaty boıynsha azamattarǵa júrgizýshi kýálikterin berý jáne kólikti tirkeý boıynsha memlekettik qyzmetterdi kórsetý úshin mamandandyrylǵan halyqqa qyzmet kórsetý ortalyqtary jumys isteýde. Búgingi tańda elimizde 14 mamandandyrylǵan HQO jáne 3 sektor bar. Bıyl Atyraý jáne Batys Qazaqstan oblystarynda mamandandyrylǵan HQO bólimderin ashý josparlanyp otyr.