Sammıt ótken elder sanaýly. Solardyń biri ári biregeıi – Qazaќstan
Pan Gı MÝN, BUU Bas hatshysy:
– Men EQYU-daǵy Qazaqstannyń tóraǵalyǵyn joǵary baǵalaımyn. On bir jyl boıy bolmaǵan sammıttiń ótkizilýi Qazaqstannyń kóshbasshylyǵyn ǵana emes, Nursultan Nazarbaevtyń jeke óz basyna berilgen úlken baǵa, onyń jahandyq mańyzy bar bastamalary men ıdeıalarynyń moıyndalǵandyǵynyń belgisi dep oılaımyn. Astanada EQYU Sammıtin ótkizý arqyly Qazaqstan TMD elderi men Ortalyq Azııa memleketteri arasynda birinshi bolyp sýyrylyp alǵa shyǵyp, ózara áriptestiktiń jańa dáýirine jol ashty.
Hılları KLINTON, AQSh Memlekettik hatshysy:
– Tuńǵysh ret EQYU Sammıtiniń Ortalyq Azııadaǵy elde ótip otyrǵandyǵy Uıymnyń jáne Helsınkı qaǵıdattarynyń bir ǵana topta nemese jekelegen elderde ǵana emes, búkil álemde derlik qoldanylatyndyǵyn kórsetedi.
Astanadaǵy bul Sammıt úlken mańyzǵa ıe. Bul Sammıtti ótkizgen Qazaqstan Táýelsizdik alǵan jyldar ishinde tolaıym tabystarǵa, onyń ishinde ekonomıkalyq jetistikterge qol jetkizdi. Osy arqyly ol óziniń aldyna maqsat qoıyp, sony oryndaı alatyn el ekenin kórsetti.
Sergeı LAVROV, Reseı Federasııasynyń Syrtqy ister mınıstri:
– Qazaqstan tóraǵalyǵynyń daýsyz jemisi dep on bir jyl boıy ótkizilmegen Uıym Sammıtin uıymdastyrýyn ataýǵa tıispiz. Kópke málim, Reseı prezıdenti Dmıtrıı Medvedev Sammıt ótkizý jaıyndaǵy Qazaqstan Prezıdenti Nursultan Nazarbaevtyń bastamasyn alǵashqy bolyp qoldady. Jáne osy jolǵy Sammıttiń tuńǵysh ret geografııalyq Eýropadan tys aımaqta ótkizilýi uıymǵa múshe eýropalyqtar men azııalyqtardyń arasyndaǵy úzilmeıtin baılanystyń belgisindeı boldy.
Angela MERKEL, Germanııa Kansleri:
– Biz Helsınkı aktisi ómirge kelgennen keıin 35 jyldan soń júzdestik. Sodan beri álem óte qatty ózgerdi. Qazirgi kúngi Vankýver men Vladıvostok arasyndaǵy keńistik ol kezdegiden múlde basqasha sıpatta. Osyndaı jaǵdaıda Prezıdent Nazarbaevqa Astana Sammıtin uıymdastyrǵany úshin alǵysymdy bildiremin. Tuńǵysh ret EQYU Sammıti Ortalyq Azııada ótkizildi. Bul osy aımaqqa jańasha kózben qaraýǵa múmkindik beredi.
Aleksandr LÝKAShENKO, Belarýs Respýblıkasynyń Prezıdenti:
– Astana Sammıtiniń ótkizilýi – Nursultan Nazarbaev baǵyndyrǵan eń bıik beles bolyp tabylady. Ol bul belesti joǵary etip qoıdy jáne ondaǵy óziniń mindettemelerin tamasha oryndap shyqty. Men EQYU-nyń sammıtterine osymen úshinshi ret qatysqan saıasatkermin. Mundaı joǵary ótken jıyndy áli kórgenim joq.
Men Nursultan Ábishulyna, ózge de saıasatkerler aıtqanyndaı, bul Sammıt jumysy barlyq segmentter boıynsha keremet uıymdastyrylǵanyn atap kórsetemin. Netken tamasha úderis, sheneýnikter, qaýipsizdik qyzmeti, jýrnalıster – bári de shynaıy dostyq nıette qonaqjaılylyq tanytty. Sammıt jumysyna eshkim de kedergi jasamady. Biz Qazaqstannan úırenýimiz kerek.
Kevın RADD, Avstralııa Syrtqy ister mınıstri:
– Qazaqstan EQYU jumysyna tyń serpin berdi. Rasynda, Qazaqstan tóraǵalyǵyna deıin Uıym jumysynda birshama únsizdikke toly tynyshtyq ornaǵany eshkimge de jasyryn emes. Men Qazaqstan Prezıdentine barlyǵymyzdy úlken únqatysý alańyna shaqyrǵany úshin alǵys aıtamyn. Jáne onyń konfessııaaralyq, ultaralyq kelisim jolyndaǵy jumysy atap aıtýǵa turarlyq. Búginde bul óte mańyzdy másele.
Sammıt asa úlken jetistik boldy. Ol bir mezgilde ulan-ǵaıyr aımaqta ornalasqan elderdiń basshylaryn jınady. Keńistiktegi qaýipsizdik máselesin tek beıbit jolymen qamtamasyz etýdiń basty qaǵıdat ekenin barlyǵyna maquldatqyzdy.