Dýbaı shaharynda 2020 jyldyń 20 qazany men 2021 jyldyń 10 sáýiri aralyǵynda Dúnıejúzilik EKSPO kórmesi ótedi. «Bolashaq úshin sana-sezimdi biriktirý» taqyrybynda, onyń ishinde «Múmkindik», «Mobıldilik» jáne «Turaqtylyq» degen uǵymdardan turatyn kórmeni 25 mıllıonnan astam adam tamashalaıdy dep kútilýde. Jalpy, EKSPO kórmesi Taıaý Shyǵysta alǵash ret ótkizilmek.
Kórme kesheni «úsh japyraq» pishininde usynylǵan jáne Birikken Arab Ámirlikteriniń pavılony, sondaı-aq kórme uǵymdaryna saı 3 taqyryptyq klaster dıametri 150 metrdi quraıtyn «Ál-Vasl» plazasy ortalyq nysanynyń qasynda ornalasady. BAÁ pavılonynyń jobasyn ıspanııalyq sáýletshi Santıago Kalatrava, «Múmkindik» pavılonyn BIG (Bjarke Ingels Group), «Mobıldilik» pavılonyn Foster and Partners, «Turaqtylyq» pavılonyn Grimshaw Architects kompanııalary jasady.
EKSPO kesheniniń jalpy aýmaǵy 438 gektardy quraıdy. Oǵan 150 gektar kóleminde kórme aýmaǵy, sondaı-aq jerústi metro stansasy, «Dubai South Mall» saýda ortalyǵy, turǵyn úı, logıstıkalyq jáne qonaq úı nysandary kiredi. Qazirgi ýaqytta «EKSPO-2020 Dýbaı» kórmesine 170 memleket qatysatyndyǵyn rastasa, 55 el kelisimge qol qoıyp úlgerdi.
«Astana EKSPO-2017» UK» AQ baspasóz qyzmetiniń habarlaýynsha, Dýbaıdaǵy Dúnıejúzilik EKSPO-2020 kórmesinde Qazaqstan Respýblıkasynyń Ulttyq seksııasynyń bas komıssary, «Astana EKSPO-2017» UK» AQ basqarma tóraǵasynyń orynbasary Allen Sháıjúnisov pen «EKSPO-2020 Dýbaı» bıýrosynyń atqarýshy dırektory Nadjıb Mohammed ál-Álı de kelisimge qol qoıdy.
«Egemen-aqparat»