Álemge aty máshhúr Krıshtıaný Ronaldýdyń kún saıyn bir rekord jańartatyny belgili. Onyń ómirindegi ózgeristerdiń barlyǵyn qalt jibermeı jazyp otyratyn álemdik baspasóz keıde jeke ómirine de qol suǵyp jiberedi. Al bizge qyzyǵy Ronaldýdyń sporttyq tabystary. Jer jahandaǵy eń kóp jankúıeri bar sportshynyń qandaı rekordtary bar. Negizgilerin tize otyrsaq.
Búgin túnde madrıdtik «Real» syrt alańda «Iýventýspen» kezdesedi. Bul – Chempıondar lıgasynyń shırek fınaldyq kezdesýi. Alǵashqy oıyn Zınedın Zıdan komandasyna aýyr bolary anyq. Sebebi Býffon qorǵaǵan qaqpaǵa gol soǵý qıynnyń qıyny. Onyń ústine «Iýve» qorǵanysqa bekem komanda. О́tken jylǵy fınalısterdiń qaıtalanǵaly turǵan oıynynda Krıshtıaný Ronaldý gol soǵyp, tirkegen rekordyn jańartýy yqtımal. Jalpy, portýgal oıynshysynyń «Real» sapyndaǵy rekordtary mynandaı:
Eýrokýboktardyń úzdik surmergeni – 120 gol
Chempıondar lıgasynyń úzdik surmergeni – 117 gol
Chempıondar lıgasynyń bir maýsymynda eń kóp gol soqqan fýtbolshy – 2013/14 jylǵy maýsymda 17 gol soqqan
Chempıondar lıgasynyń fınalynda eń kóp jeńiske jetken fýtbolshy – 4 márte (Inesta men Zeedorfta da osyndaı kórsetkish)
Chempıondar lıgasynyń 3 fınalynda gol soqqan jalǵyz oıynshy
Chempıondar lıgasynyń toptyq kezeńindegi barlyq matchta gol soqqan jalǵyz oıynshy
«Realdyń» eń úzdik surmergeni – 443 gol
«Altyn dopqa» eń kóp ıe bolǵan fýtbolshynyń biri – 5 márte (Leonel Messımen birdeı)
Shamasy bıylǵy jarystyń da úzdik surmergeni Ronaldý atanatyn shyǵar. Osy ýaqytqa deıin ol 12 gol soǵyp úlgerdi. Al ony qýyp kele jatqan tek «Sevılıa» shabýylshysy Vıssam Ben Ieder ǵana. Ol 8 gol soqqan.
Sonymen qatar Ronaldýdyń rekordtary ulttyq qurama sapynda da birshama. Ol Portýgalııa quramasymen 2016 jylǵy Eýropa chempıonatynda jeńimpaz bolǵan kezde kóptegen rekordtar ornatyp tastady. Mysaly:
Eýronyń fınaldyq kezeńinde kóp oıyn ótkizgen fýtbolshy – 21 match
Eýro fınaldyq kezeńinde kóp gol soqqan fýtbolshy – 9 gol (Mıshel Platınımen birdeı)
Ronaldý 4 birdeı Eýroda gol soqqan oıynshy
Ártúrli eýro dodalarda eń kóp het-trık jasaǵan fýtbolshy
Irikteý týrnırimen qosa alǵanda Eýroda eń kóp gol soqqan fýtbolshy – 29 gol
Álem chempıonaty men Eýronyń irikteýinde eń kóp gol soqqan oıynshy – 50 gol
Portýgalııa quramasynda eń kóp oıyn ótkizgen fýtbolshy – 149 gol
Portýgalııa quramasynyń eń úzdik surmergeni – 81 gol (Ulttyq qurama úshin tek eki oıynshy ǵana odan kóbirek gol soqqan: Alı Daeı (Iran 109 gol) jáne Ferens Pýshkash (Vengrııa 84 gol)
«Iýventýs» – «Real» oıyny jaıly sóz bolǵanda taǵy bir qyzyqty rekordqa kóz júgirte keteıikshi. Mysaly, Chempıondar lıgasynda óz alańynda 23 oıyn boıy utylmaǵan «Iýventýs» búgin madrıdtik klýbty tyqsyryp tastaýy ǵajap emes. Al «Iýventýspen» birge sonaý 2013 jyldan beri óz stadıonynda jeńilmegen bir klýb bar. Ol – «Barselona». Aıtpaqshy, olar 4 sáýir kúni «Kamp Noýda» ıtalııanyń «Romasyn» qabyldaıdy.
Sonda «Barselona» men «Iýventýsty» óz jerinde utqan kim degen suraq týyndaıdy. Jaýap bireý – «Bavarııa». «Barselona» óz alańynda 25 oıyn utylmasa, «Iýventýs» 23 oıynǵa deıin shydap tur. Al bul jaǵynan rekord kimdiki deseńizder taǵy da – «Bavarııa» dep jaýap beremiz. Nemister 1998 jyldyń 4 naýryzynan bastap, 2002 jyldyń 2 sáýirine deıin óz alańynda 29 oıyn boıy múlde jeńilmeı kelgen. Al bul komanda «Iýventýs» pen «Real» kezdesip jatqan shaqta «Sevılıanyń» alańynda kúsh synasady.
Sóz sońynda keshe ǵana jaryq kórgen ÝEFAnyń resmı málimdemesin aıta keteıik. Jarystyń bıylǵy qatysýshylaryna beriletin qarjynyń mólsherlemesi aıtyldy. Iаǵnı, shırek fınalǵa shyqqan barlyq 8 komandaǵa 6,5 mıllıon eýrodan beriletin boldy. Al kelesi kezeńge, ıaǵnı jartylaı fınalǵa shyqqan komandalarǵa taǵy da 7,5 mıllıon eýro kóleminde syıaqy tabystalady. Al fınalıst 11 mıllıon eýro alsa, jeńimpaz komandaǵa 15,5 mıllıon beriledi. Sonda jarystyń jeńimpazy atanǵan klýb barlyǵy 57,2 mıllıon eýro tabys túsire alady. Sebebi ÝEFA qarjy departamenti Chempıondar lıgasynyń toptyq kezeńinde óner kórsetken klýbtarǵa 12,7 mıllıonnan beretin bolypty. Jarystaǵy árbir jeńiske olar 1,5 mıllıon eýro, teń nátıjege 500 myń eýro taǵaıyndapty.
Ermuhamed MÁÝLEN, «Egemen Qazaqstan»