Áıelder – názik jaratylǵan jandar. Olardyń boıynda er-azamattardaı kúsh-qýat joq deımiz. Osy oı-pikirimizdiń ózi keıbir jaǵdaılarda tym birjaqty aıtylatyndaı kórinedi. Buǵan Oıyl aýdanynda Naýryz merekesine arnalǵan is-sharalar sheńberinde «Nıva» avtokóligin súıreýden áıelder arasynda ótkizilgen saıys naqty dálel bola alady.
Bul jeńil avtokólikter sanatyna kirgenimen, salmaǵy ájeptáýir ekeni ekiniń birine belgili. Soǵan qaramastan atalǵan aıryqsha báseke kezinde oǵan qatysqan áıelder er-azamattardyń boıynan tabyla bermeıtin kúsh-jiger kórsetkeni kópshiliktiń erekshe qyzyǵýshylyǵy men yqylasyn týǵyzdy. Atap aıtqanda Madına Nurmaǵambetova, Nurjanat Qaýmeshova jáne Gúlbaqyt Jumaǵazına syndy áıel-analar «Nıvany» on metr jerge deıin súırep jetkizdi. Mine, kúsh-qaırat qaıda dep úlkendi-kishiniń bári buǵan súıispenshilik tanytyp turǵan kezde «Nıvany» súıreý kezegi zeınet jasyndaǵy kóp balaly ana, Aqshataý aýylynyń turǵyny Qanzıbash Nurǵazınaǵa keldi. Ol birden avtokólikti beıne bir qol shanadaı zyryldatyp alǵa qaraı súırep ala jóneldi. 57 jastaǵy kúsh-qaıraty men erik-jigeri mol egde áıeldiń bul is-áreketi jurttyń bárin tańǵaldyrdy. Bul «Nıva» kóligin súıreýden saıysqa túsken áıelder arasyndaǵy qaıtalanbas eń joǵary kórsetkish dep baǵalandy. Muny Gınnestiń rekordtar kitabyna jazý kerek dep tarqasty naǵyz nar qyzǵa tán óner kórsetken jasy ulǵaıǵan ananyń shalt qımylyna rıza bolǵandar.
Temir QUSAIYN, «Egemen Qazaqstan»
Aqtóbe oblysy, Oıyl aýdany