Parlament Senatynyń depýtattary Abdaly Nuralıev pen Muratbaı Joldasbaev Jambyl oblysy, Baızaq aýdanynda jumys babyndaǵy saparda boldy.
Aımaqtaǵy sapar aıasynda senatorlar eńbek ujymdarymen kezdesip, Memleket basshysynyń bes áleýmettik bastamasynyń basty baǵyttaryn jan-jaqty túsindirdi. Ásirese, aýyldyq jerlerde mańyzdy bolyp otyrǵan máseleler, atap aıtqanda turǵyn úı úshin jeńildetilgen paıyzben nesıe alý, shaǵyn kásipkerlikti bastaý, eńbekaqysy tómen adamdarǵa salyq júktemesin azaıtý máseleleri týraly aıtyldy. Sondaı-aq jas mamandardy jergilikti jerlerde turaqtandyrý máseleleri de qozǵaldy.
Senatorlar sapar aıasynda birqatar áleýmettik nysandarda da boldy. Aýdan ortalyǵy Sarykemer aýylyndaǵy 175 oryndyq jekemenshik «Eńlik» balabaqshasynyń jumysymen tanysyp, eńbek ujymymen kezdesti. Sarykemer orta mektebinde ornalasqan «Rýhanı jańǵyrý» jobalyq keńsesinde senatorlar ustazdar qaýymymen jáne mektep oqýshylarymen júzdesti. Kezdesý barysynda Memleket basshysynyń «Prezıdenttiń 5 áleýmettik bastamasy» atty Úndeýi men Elbasynyń bıylǵy Joldaýy týraly jan-jaqty túsindirme berildi.