Elbasy kitaphanasy mýzeı jınaqtary toptamasyn tanystyrýdy jalǵastyrady. Mýzeı qorynyń árbir jańa jádigeri Memleket basshysynyń belsendi syrtqy saıası qyzmetiniń jarqyn kórinisin aıqyndaıdy.
Bıyl Qazaqstan men Amerıka arasyndaǵy dıplomatııalyq qatynastar tarıhynyń mańyzdy oqıǵalarynyń biri – Qazaqstan Respýblıkasy Prezıdentiniń AQSh-qa saparynan bastaldy. Ústimizdegi jyldyń 16–18 qańtarynda Nursultan Nazarbaev resmı sapar barysynda AQSh Prezıdenti Donald Tramppen, sondaı-aq AQSh-tyń resmı jáne isker toptar ókilderimen kezdesti. Buǵan qosa, Qazaqstan Prezıdenti BUU Qaýipsizdik Keńesiniń otyrysyna tóraǵalyq etti.
Sapar barysynda 20-dan astam avıasııa jáne ǵaryshty zertteý, munaı-hımııa jáne aýylsharýashylyq salalaryndaǵy jobalardy, sonymen qatar quny 7 mlrd-ty quraıtyn ınfraqurylymdy damytý salasynyń jobalaryn júzege asyrýǵa baǵyttalǵan ınvestısııalyq jáne saýda-ekonomıkalyq yntymaqtastyq týraly kommersııalyq qujattarǵa qol qoıyldy. Memleket basshysy AQSh-qa resmı sapar aıasyndaǵy kezdesýlerdi qorytyndylaı kele:
– Sapar sátti boldy. Eń bastysy – naqty máseleler boıynsha naqty kelisimder jasaldy.
AQSh Prezıdenti Donald Tramp Nursultan Nazarbaevqa kezdesýden estelik retinde golf sportynyń doby men taıaǵyn tartý etti. Donald Tramptyń golf sportynyń tanymal jankúıeri jáne birneshe golf klýbynyń qojaıyny ekeni barshaǵa málim. Amerıka Prezıdenti golf oıyny – ómiriniń ajyramas bóligi ekenin talaı ret aıtqan bolatyn:
– Ár adam bos ýaqytyn ózinshe ótkizedi. Qaýyrt jumys arasynda sharshaǵanyńdy basyp, oıyńdy jınaqtaǵan durys. Sondyqtan da golf oıynyn jaqsy kóremin. Bul – oıǵa shomýmen birge ózińdi erkin ustap, boıyńdy sergitýge arnalǵan oıyn. Golf meniń shyǵarmashylyǵymdy oıatyp, ómirime qatysty máselelerdi ońtaıly sheshýime múmkindik beredi. Bul – ǵajaıyp sport túri.
Amerıka prezıdentteriniń barlyǵy derlik osy oıynnyń jankúıerleri. Sońǵy 130 jyldyń ishinde Amerıkany basqarǵan eki prezıdent qana golf oınamaǵan eken. Tarıhta eń alǵash golf taıaǵyn qolyna alǵan Amerıka prezıdenti – AQSh-tyń 25-shi prezıdenti Ýılıam Mak-Kınlı (1897–1901 jj.) boldy. Golftiń eń jyldam oıynshysy ataǵyna 41-shi prezıdent úlken Djordj Býsh (1989–1993 jj.) ıe bolǵan. D. Býsh – golf dańqy zalyna engizilgen jalǵyz prezıdent. Aq Úıdiń eń nátıjeli golf oıynshysy dep AQSh-tyń 42-shi prezıdenti Bıll Klıntondi (1993–2001 jj.) ataıdy.
Dúnıejúzi boıynsha golfpen 70 mıllıonǵa jýyq adam shuǵyldanady. Munyń ózi resmı oıynshylar – sportshylar jáne federasııa men golf klýbtarynyń músheleri.
Golftiń zamanaýı oıyny men alǵashqy golf klýbtary Shotlandııadan shyqqan. Munda oıynnyń alǵashqy jazbasy jáne 18 shuńqyrly júıe erejeleri jasalǵan. Aldyn ala oılastyrylǵan qurylymdyq alǵashqy týrnırler Shotlandııanyń túrli qalalarynda ótkizilgen. Kóp uzamaı golf oıyny jappaı Anglııanyń aýmaǵyna, sodan soń búkil álemge taralǵan. Búginde Masselboro ıppodromynda ornalasqan Old Links alańy golftiń eń kóne alańy bolyp sanalady.
Qazaqstan Respýblıkasyndaǵy golftiń damý tarıhy azdy-kópti 20 jyldy qamtıdy. Golf oıyny Qazaqstanda elimizdiń Prezıdenti Nursultan Nazarbaevtyń qoldaýy men belsendi atsalysýynyń arqasynda paıda bolyp, damyp keledi dep nyq senimmen aıta alamyz.
Jyl saıyn Almaty qalasynda Qazaqstan Prezıdentiniń Kýbogine Golften halyqaralyq týrnır ótkiziledi. Jyldan-jylǵa oıynshylar sany artyp, aýqymy keńeıip, básekelestik kúsheıýde. Oǵan qosa oıynshylardyń sheberligi shyńdalyp keledi.