«Egemen Qazaqstan» gazeti byltyr oqyrmanǵa jol tartqan mektep bitirýshi túlekterge arnalǵan Ulttyq biryńǵaı testileýge daıarlyq jobasyn bıyl da jalǵastyrýda.
Joǵary oqý ornyna qujat tapsyrýshy talapkerler úshin paıdasy zor joba aıasynda bıylǵy UBT suraqtary men jaýaptaryn respýblıkalyq Kazbilim ortalyǵynyń mamandary ázirlep usynyp otyr. Atalǵan joba aıasynda bas basylym basshysy Darhan Qydyráli men respýblıkalyq Kazbilim ortalyǵynyń jetekshisi Aıatjan Ahmetjanuly ekijaqty yntymaqtastyq týraly memorandýmǵa qol qoıdy.
Ekijaqty kelisim negizinde endi ár aptanyń seısenbisinde oqyrman gazet ishindegi kitapsha túrinde jarııalanǵan Ulttyq biryńǵaı testileý suraqtarymen tanysyp, onyń durys jaýaptaryn belgilep, qansha ball jınaǵanyn bile alady.
Qujatqa qol qoıý barysynda gazet basshysy D.Qydyráli basylymnyń qazirgi otandyq bilim berý salasynda oryn alyp jatqan jańashyldyqtar men kúrdeli máseleler tóńireginde oqyrmandarǵa, sonyń ishinde muǵalimder men mekteptiń joǵary synyp oqýshylary úshin paıdaly kontent usynýdy kózdeıtinin, sondaı-aq muǵalim abyroıy men mártebesine, bilim berý múmkindikterin ulǵaıtýǵa baılanysty máselelerge redaksııanyń beı-jaı qaramaıtynyn, osy tarapta aǵartýshylyq baǵytty kúsheıtý arqyly bilim salasyna aıtarlyqtaı qoldaý kórsetilip otyrǵanyn jetkizdi. О́z kezeginde respýblıkalyq Kazbilim ortalyǵynyń jetekshisi A.Ahmetjanuly el ishindegi, shalǵaı eldi mekenderdegi bilim salasyndaǵy máselelerge toqtalyp, basylym basshylyǵynyń qoldaýyna rızashylyq bildirdi.
Aıta ketý kerek, byltyr bas basylymda Ulttyq biryńǵaı testileý ortalyǵymen áriptestik sheńberinde UBT-ǵa daıarlaý jobasy júzege asyrylǵan bolatyn. Bıyl atalǵan memlekettik mekememen qabyldanǵan memorandým aıasynda Elbasy tapsyrmasyna sáıkes, muǵalimderdiń biliktilik deńgeıin eskeretin kategorııalardyń jańa kestesine baılanysty ustazdarǵa arnalǵan ulttyq biliktilik testileýdi jarııalaý josparlanyp otyr.
Dýman ANASh, «Egemen Qazaqstan»