Ortalyq kommýnıkasııalar qyzmetiniń baspasóz maslıhatynda Qazaqstan Respýblıkasy Ishki ister mınıstirligi Ákimshilik polısııa komıteti tóraǵasynyń orynbasary Maqsat Baıbolov BAQ ókilderimen quqyq buzýshylyqtardyń aldyn alý máselelerinde polısııanyń halyqpen jáne azamattyq qoǵammen ózara birlese jumys isteý týraly málimetpen bólisti.
«Jalpy elimiz boıynsha qoǵamdyq tártipti saqtaýǵa jyl saıyn 29,5 myńnan astam adam qatysady, olar 4,5 myń quqyq qorǵaý baǵytyndaǵy qoǵamdyq qurylymdarǵa biriktirilgen. Mysaly, aýyldyq jerlerde «Saqshy» jasaqtary jumys isteıdi, olar kóbinese mal urlyǵynyń aldyn alýǵa baǵyttalǵan. Elimizdiń oqý oryndarynda «Stýdenttik jasaqtar» jumys isteıdi, olar atalǵan mekemelerdiń, sondaı-aq stýdenttik qalashyqtar men jataqhanalardyń aýmaqtaryn patrýldeıdi, usaq quqyq buzýshylyqtardyń jolyn kesedi, stýdentter arasynda túsindirý jumystaryn júrgizedi. Aǵymdaǵy jyly kórsetilgen qurylymdardyń qatysýymen 1,4 myńnan astam qylmys ashyldy, ákimshilik quqyq buzýshylyq jasaǵany úshin 12,5 myń adam ustaldy. Zańnamalyq deńgeıde asa belsendi azamattardy gramota, alǵys hat, baǵaly syılyq jáne aqshalaı syıaqylarmen kótermeleý múmkindigi bar ekenin atap ótý qajet. Aǵymdaǵy jyldyń tek 1 toqsanynda polısııaǵa belsendi kómek kórsetkeni úshin IIO-nyń ótinishteri boıynsha ákimdikter 955 adamdy kótermeledi, onyń ishinde 765 adam 14,5 mln teńgeden astam somaǵa aqshalaı syıaqymen marapattaldy», dedi Maqsat Baıbolov.
Sonymen qatar ol jyl saıyn elimizdiń aýmaǵynda «Ýchastke» respýblıkalyq jedel-profılaktıkalyq is-sharasy ótkiziletinin málimdedi.
«Is-shara barysynda ýchaskelik polısııa ınspektorlary ózderiniń ýchaskelerindegi árbir úıge jáne páterge barýǵa tyrysady, halyqpen tanysady, týyndaǵan problemalar týraly surastyrady jáne ózderiniń vızıt kártishkelerin taratady. Odan bólek, jyl aralyǵynda ýchaskelikter udaıy túrde toqsanda keminde bir ret halyq aldynda esep berýler júrgizedi, olardyń barysynda atqarylǵan jumys týraly esep beredi, sondaı-aq azamattardan kelip túsken shaǵymdar men usynystarǵa den qoıady. Máselen, aǵymdaǵy jyly ýchaskelik polısııa ınspektorlary 25 myńnan astam esep berý kezdesýlerin júrgizdi onda 1,5 mln. astam azamat qatysqan. Sońǵy bes jylda ótkizilgen osyndaı aksııalardyń nátıjesinde halyq aqshalaı syıaqyǵa erikti túrde 47 myńnan astam atys qarýyn, 250 jarylǵysh qurylǵylar men 1,7 mln danadan astam oıyq qarý patrondaryn tapsyrdy. Barlyǵy erikti túrde qarý-jaraq zattaryn tapsyrǵany úshin osy jyldary 38 myń azamatqa 1 mlrd. 418 mln. teńge tólengen. Osyndaı aksııalardy ótkizýdiń tıimdiligin atys qarýyn qoldana ortyryp jasalǵan qylmystar sanynyń jalpy 44,8 paıyzǵa jyl saıynǵy azaıǵany kórsetip otyr. Aǵymdaǵy jyly aksııa sáýirdiń 10-nan bastalady, bul maqsatqa respýblıkalyq bıýdjetten 125,4 mln. teńge bólingen. Zańsyz saqtalǵan qarý-jaraq zattardy azamattardyń erikti túrde ótemeli tapsyrý qaǵıdalary Ishki ister mınıstriniń buıryǵymen bekitilgen. Bul qaǵıdalarda qarýdy erikti túrde tapsyrǵany úshin qarýdyń ár birligine, onyń tehnıkalyq jaǵdaıyna jáne qarý túrine qaraı somasy onnan júz aılyq eseptik kórsetkishke deıin tólem kózdelgen. Zańsyz saqtalǵan atys qarý-jaraq zattardy erikti túrde tapsyrǵan adamdar qylmystyq jáne ákimshilik jaýapkershilikten bosatylady. Osy sátti paıdala otyryp, saqtaýda zańsyz qarý-jaraq zattary bar azamattarǵa olardy aqyly negizde ishki ister organdaryna erikti túrde tapsyrýdy ótinemin», dedi Ishki ister mınıstirligi Ákimshilik polısııa komıteti tóraǵasynyń orynbasary.
Raýan QAIDAR, «Egemen Qazaqstan»