«Almaty» aýdanynyń 59 nysanynda órt qaýipsizdigi normalarynyń qanshalyqty saqtalatyny tekserilip jatyr, dep habarlaıdy elorda ákimdiginiń resmı saıty.
Búgin «Almaty» aýdany TJ basqarmasynyń qyzmetkerleri Astana Mall saýda oıyn-saýyq ortalyǵyna kezekten tys tekserispen bardy.
«QR Bas prokýratýrasynyń nusqaýy men Ishki ister mınıstriniń buıryǵyna sáıkes biz kezekten tys tekserispen shyqtyq. Búgingi olqylyqtardyń barlyǵy quqyqtyq statıstıka organdarynda tirkelip, arnaıy esepke alynatyn bolady. Al erteń tekseris jumystaryn bastaıtyn bolamyz. Biz qosymsha evakýasııalaý esikteriniń biri jabyq ekenin anyqtadyq. Ilýli turǵan belgilerden adamdardyń ǵımaratqa bir esikten kirip, sol esikten shyǵatynyn baıqaýǵa bolady. Budan bólek, kólemdi belgilerdiń, navıgasııanyń joqtyǵy anyqtaldy», - dep málimdedi «Almaty» aýdany TJB-nyń basshysy Nurlan Omarov.
Aýdan ákimi Ádilbek Sársembaevtyń aıtýyna qaraǵanda, anyqtalǵan buzýshylyqtar úshin erejeni buzýshylar aıyppulǵa kesiledi.
«Búgin biz osy ǵımaratta birneshe olqylyqtyń bar ekenin anyqtadyq. Mysaly, qosymsha shyǵý esigi qulyptalǵan. Bul – óte óreskel buzýshylyq. Osyǵan oraı, tıisti kólemde aıyppuldar tólenýi qajet. Meniń tapsyrmam boıynsha TJB erteń atalmysh nysandy tekserýge kirisedi», - dedi aýdan ákimi.
Qazirgi tańda Astana Mall SOSO-da 12 shyǵý esigi bar. Olardyń ony – evakýasııaylyq esikter.
Aıta keteıik, elordanyń «Almaty» aýdanynda 59 saýda nysany men 3 oıyn-saýyq ortalyǵy bar. Búginge deıin «Almaty» aýdanynyń TJB atalmysh nysandardyń beseýinde tekseris jumystaryn júrgizip úlgergen. Tekseris jumystary, sondaı-aq, iri turǵyn úı keshenderinde de júrgizilmek. Barlyq nysandar kestege sáıkes tekseriletin bolady.