Respýblıka óńirlerinde turaqty ekonomıkalyq ósimdi qalyptastyrýdyń alatyn orny aıyryqsha. Ekonomıkany odan ári damytý jóninde Úkimet qoıyp otyrǵan basty talaptar men mindetter 2018 jylǵa arnalǵan maqsatty ındıkatorlarǵa qol jetkizýdi kózdeıdi. Ony qaı óńir qandaı tutqalar men tetikterdi iske qosý arqyly atqarady? Bul máselege Úkimet tarapynan tolyq erkindik berilgen.
О́ıtkeni qoǵamdyq-ekonomıkalyq ómir men ósim qatyp qalǵan nárse emes, kerisinshe udaıy qozǵalys dınamıka jáne ósý men órleý ústindegi úderis. Sondyqtan da ár óńirdiń ereksheligine tán jobalardy elep-ekshep qoldanysqa engizgenniń eshqandaı artyqshylyǵy joq. Tek sonyń bári túpteı kelgende óńir ekonomıkasynyń órge basýyna yqpalymen kómegin tıgizse bolǵany.
Osy oraıda taıaýda Aqtóbe aımaǵynda el óńirlerinde eshqandaı balamasy joq Jobalyq basqarma quryldy. Onyń quramyna oblystaǵy óndiristik jáne áleýmettik sıpatta qyzmet atqaratyn basqarmalar tolyqtaı engizilgen. Qazirgi kúni munda 2018 jyldyń qorytyndysy boıynsha ekonomıkalyq ósimdi 5 paıyzdan kem túsirmeý jónindegi jospar jasaqtalǵan. Bul elimizdegi kez-kelgen enshisine tıe bermeıtin kúrdeli de jaýapty is ekeni anyq.
Sondyqtan da alǵa qoıylǵan maqsattar keshendi is-sharalar údesinen shyǵý úshin Jobalyq shtab qurylǵan. Onyń basty is-qımyl áreketi naqty ári nátıjeli jumystar júrgizýge baǵyttalǵan. Bir sózben aıtqanda Jobalyq shtab maqsatty ındıkatorlarǵa qol jetkizýdiń basty kepili bolmaq. Bul rette oblysta ekonomıkalyq ósimdi jlǵa qoıýdyń 15 tarmaqtan turatyn negizgi baǵyttary aıqyndaldy.
Onyń alǵashqysy óńirge qomaqty ınvestısııa tartý jobasynan bastaý alady. Soǵan saı bıyl 416 mıllıard teńge kóleminde 26 iri ınvestısııalyq jobany júzege asyrý belgilengen. Onyń belgili bir bóligin memleket-jekemenshik áriptestigi aıasyndaǵy jobalar quraıdy. Tutastaı alǵanda 2018 jylǵy oblys ekonomıkasyna 512 mıllıard teńgeden astam ınvestısııa tartylmaq. Bul oblys bıýdjetine túsetin salmaqty jeńildetýdiń basty kilti retinde qarastyrylýda. Osy yńǵaımen bazalyq ındýstrııalandyrý, otyn-energetıka kesheni men shaǵyn jáne ortasha bıznes qurylymdaryn damytý, saýda sapasyn jaqsartý, sondaı-aq agroónerkásip, kólik-logıstıka keshenin órkendetý baǵyttary jóninde de baıandap berýge bolady. Áıtse de «teńizdiń dámi tamshysynan bilinedi» degendeı jobalyq basqarma sheńberine kirgen qaı-qaı jobanyń da arqalaıtyn júgi salmaqty ekeni eshqandaı talas týǵyzbaıdy.
Tek bir qosarymyz Aqtóbe óńirinde ekonomıkalyq ósimdi 5 paıyzǵa deıin ósirý jónindegi keshendi is-sharalar ony jalań túrde iske asyrýdy maqsat etpeıdi. Sonymen birge alǵa qoıylǵan basty mindetti júzege asyrý arqyly áleýmettik máselelerdiń túıinin de qosa sheshý joldary qarastyrylǵan. Atap aıtqanda jumyssyzdyq deńgeıin edáýir azaıtý men eńbek naryǵyn jańǵyrtý jónindegi ister de Jobalyq basqarma júrgizetin jumystar qataryna qosylady. Sondaı-aq bilim berý men densaýlyq saqtaý salasynda atqarylatyn jobalar da Jobalyq basqarmanyń júgi men salmaǵyn tereńdete túsedi. Tipti Memleket basshysynyń bes áleýmettik bastamasyn júzege asyrý sheńberindegi sharalar da jańa qurylymnyń aıasynan tys qalmapty. Aıtalyq bıyl Aqtóbe qalasynda tehnıkalyq jáne kásiptik bilim beretin oqý oryndary úshin on eki, al joǵary oqý orny úshin bir jataqhana salý belgilengeni osy pikirimizdiń basty aıǵaǵy.
Sóz sońynda Aqtóbe aımaǵynda qolǵa alynǵan ekonomıkalyq ósimdi ósirý tetini qandaı nátıjeler beretinine ýaqyttyń ózi tóreshi bola alady demekpiz.
Temir QUSAIYN, «Egemen Qazaqstan»