Facebook-tiń negizin qalaýshy jáne bas atqarýshysy Mark Sýkerberg seısenbi kúni Senat pen AQSh kongresi О́kilder palatasynda mıllıondaǵan áleýmettik jeli qoldanýshylary týraly derekterdiń ruqsatsyz paıdalanylýy jáne aqparattyq qaýipsizdik týraly suraqtarǵa jaýap berdi, dep habarlaıdy Reuters agenttigi.
Senatorlardyń suraqtaryna jaýap bergen Sýkerberg, Cambridge Analytica kompanııasy jınaǵan Facebook áleýmettik jelisiniń 50 mıllıon paıdalanýshysy týraly derekterdiń Reseıde saqtaýly ekeni týraly bilmeıtinin aıtty. Osy jaǵdaıdy anyqtaý úshin kompanııa jyl sońyna deıin 20 myńnan astam adamdy jumysqa alyp, jeli qoldanýshylarynyń aqparattyq qaýipsizdigi úshin jumys jasaıtynyn aıtty.
Esterińizge sala keteıik, brıtandyq Cambridge Analytica kompanııasy Facebook qoldanýshylary týraly derekterdi kóptegen elderde saıası jarnamalarda paıdalaný úshin jınaǵan. Sońǵy derekterge sáıkes, kompanııa áleýmettik jelilerdiń 87 mıllıon paıdalanýshysy týraly aqparatqa qol jetkizgen. Sýkerberg jeli qoldanýshylarynyń aldyndaǵy kinásin moıyndap, keshirim retinde Brıtanııa gazetterindegi jarnamany satyp alǵan bolatyn. Sondaı-aq, Facebook-tiń jelini paıdalanýshylardyń jeke habarlamalaryn saqtaıtyny týraly belgili bolǵan.
Senatorlardyń bes saǵat boıǵy saýalnama barysynda Sýkerberg Facebook-tegi birqatar máselelerge baılanysty birneshe ret keshirim surady. Sonyń biri, jelidegi aqparattyq qaýipsizdikke baılanysty boldy. Mysaly, AQSh-tyń saılaýyna yqpal etý úshin reseılik agentterdiń Facebook-tegi aqparattardy paıdalanýy.
Sýkerberg Facebook-te qandaı fýnksııalardy qosý asa qajet degen suraqqa «Men bul pikirtalasty ártúrli sanattar boıynsha talqylaýǵa bolatyndaı etip, meniń komandammen birge talqylaýǵa shaqyramyn» dedi.
Mádına JÁLELQYZY,
«Egemen Qazaqstan»