Gazetimizdiń bıylǵy 14 aqpandaǵy №31 sanynda «Jýrnalıst nege jazyqty boldy?» atty maqala jarııalanǵan-dy. Maqalada О́skemende jaryq kóretin oblystyq «Dıdar» gazetiniń tilshisi Murathan Kenjehanulynyń «О́skemen qashan rýhanı jańǵyrady?» degen synı maqala jazǵany, ondaǵy oblys ortalyǵyndaǵy onomastıka máselesin kótergeni úshin «Shyǵys Aqparat» JShS-niń dırektory (burynǵy) Irına Iаkýnınanyń sógis bergeni jaıynda aıtylǵan bolatyn.
Sonymen qatar bul másele qoǵamda úlken rezonans týdyryp, áleýmettik jelide qyzý talqylanǵannan soń iske oblys ákimdigi aralasyp, jýrnalıstke berilgen sógis alynyp tastalǵany, redaksııada ótken jıynda memlekettik tildi jóndi bilmeıtin «Shyǵys Aqparat» JShS-i dırektorynyń ornyna qazaq-orys tilderine jetik basshy qoıý talap etilgeni maqalada jazylǵan-dy.
Maqala jaryq kórgennen keıin respýblıka men óńirdiń bir top zııaly qaýym ókilderi de «Egemende» jarııalanǵan materıalǵa silteme jasaı otyryp «Shyǵys Aqparat» basshysyn aýystyrýdy talap etip oblys ákimi Danıal Ahmetovke hat jazǵan edi. Osy hat jazylǵannan soń kóp ýaqyt ótpeı aımaq basshysy Semeı men О́skemenniń zııaly qaýym ókilderiniń, jýrnalısterdiń basyn qosyp, bir aı kóleminde «Shyǵys Aqparat» JShS dırektory ornyna memlekettik tildi de, orys tilin de biletin basshy qoıylatyndyǵyn aıtqan bolatyn. Aıtqanyndaı týra bir aıdan keıin, naqtyraq aıtsaq 9 sáýirde «Shyǵys Aqparat» AQ basqarmasynyń jańa tóraǵasy tanystyryldy.
Bul qyzmetke buǵan deıin oblystyq Ishki saıasat basqarmasy basshysynyń orynbasary bolǵan Serik Jeńisov taǵaıyndaldy. Sonymen qatar oblystyq «Rýdnyı Altaı» gazetinde de aýys-túıis oryn alyp, belgili jýrnalıst Olga Shabalına basylymnyń bas redaktory qyzmetine kirisip ketti.
Azamat QASYM,
«Egemen Qazaqstan»
О́SKEMEN