Ońtústik Qazaqstan oblysynyń joǵary oqý oryndarynda bilim alatyn 7200-den astam stýdent-jastar turatyn 26 jataqhana bar. Sońǵy eki jylda oblysta eki memlekettik joǵary oqý ornynda 1000 oryndyq jataqhana soǵylyp, paıdalanýǵa berildi. Al aǵymdaǵy jyldyń II jarty jyldyǵynda stýdentterge arnalǵan taǵy eki jataqhannyń qurylys jumystaryn bastaý kózdelip otyr.
Memlekettik hatshy Gúlshara Ábdiqalyqovanyń tóraǵalyǵymen ótken QR Prezıdenti janyndaǵy Jastar saıasaty jónindegi keńestiń HHI kóshpeli otyrysynda OQO ákimi J.Túımebaev osyndaı derekter keltirdi. Elimizdegi jastar uıymdarynyń kóshbasshylary, jastar saıasaty salasyndaǵy sarapshylar qatysqan plenarlyq otyrys ashyq áńgime formatynda ótti. Qatysýshylar aldymen Elbasynyń «Bolashaqqa baǵdar: rýhanı jańǵyrý» baǵdarlamalyq maqalasynyń 1 jyldyǵyna arnalǵan keshendi kórmesine qoıylǵan jumystarmen tanysty. Al keńes otyrysynyń kún tártibinde qoǵamdyq sanany jańǵyrtý baǵdarlamasy aıasyndaǵy qazirgi qazaqstandyq jastardyń qundylyq paıymdary jáne ózekti aspektileri men jastardyń mádenı – demalys qyzmetterin uıymdastyrý jaıy qaraldy. Din isteri jáne azamattyq qoǵam mınıstri, QR Prezıdentiniń janyndaǵy Jastar saıasaty jónindegi keńes tóraǵasynyń orynbasary Darhan Kaletaev elimizde júrgizilgen saýalnama nátıjesinde anyqtalǵan ózekti máselelerge toqtaldy. Mysaly, jastardyń 97 paıyzy Qazaqstan azamaty ekenin maqtan tutsa, 92 paıyzy ózin el patrıoty sanaıdy. «Degenmen, betin aýlaq qylsyn, saýalnamaǵa qatysqan jastardyń 8 paıyzy el qorǵaý qajet bolsa qolǵa qarý ustaýǵa daıyn ekendikterin bildirdi. Sondaı-aq, jastarymyzdyń densaýlyǵy da alańdatarlyq jaǵdaıda», - dedi D.Qaletaev. Zertteý nátıjesinde jastardyń 49,9 paıyzy kitaphanaǵa barmaǵany, 83 paıyzy ǵalamtorda kóp otyratyny anyqtalǵan. Degenmen jastardyń 82,8 paıyzy otbasyn basty qundylyq sanaıdy.
Keńeste qoǵamdyq sanany jańǵyrtý jáne jastardyń mádenı – demalys qyzmetterin uıymdastyrý týraly Mádenıet jáne sport mınıstri, «Jas Otan» jastar qanatynyń, «Qazaqstan-2050» jalpyulttyq qozǵalysynyń tóraǵalary, jas kásipkerler baıandama jasady. Tek stýdenttermen ǵana emes aýyldaǵy jastarmen, jumyssyz júrgendermen jumys isteý, úkimettik emes uıymdarmen birlesip jastar jobalaryn ázirleý jáne ulttyq qundylyqtardy zertteý, qoldaý ortalyqtaryn ashý qajettigi aıtyldy. Keńes músheleri Jastar saıasaty jónindegi keńestiń 2019 jylǵa arnalǵan jumys josparyn maquldady.
Jıyn qorytyndysynda Memlekettik hatshy Gúlshara Ábdiqalyqova birqatar mınıstrlikter men ákimderge jastardyń mádenı-demalys oryndaryn qajetti materıaldyq-tehnıkalyq bazamen nyǵaıtý, sportpen shuǵyldanýyna jaǵdaı jasaý, sporttyq mádenı úıirmelerge tegin qatysýyna qoldaý kórsetý, jastar arasynda kitap oqýdy keńinen nasıhattap, kitaphanalarǵa, teatrlarǵa, murajaıǵa barýyna jaǵdaı jasaý, BAQ-ta jáne áleýmettik jelilerde jastar saıasatynyń damý barysy jáne jastarǵa qoldaý sharalary týraly aqparat taratý, jastarǵa jasalatyn jeńildikter men tómen baǵalar, sol oryndardaǵy jumystar jaıly aldyn ala tanystyryp otyrýdy tapsyrdy. Jalpy otyrystan keıin keńes músheleri óńir jastarymen «ashyq áńgime» formatynda kezdesýler ótkizdi.
Aıta ketelik, oblystaǵy jastardyń sany 750 myń shamasynda, ıaǵnı, oblys halqynyń jalpy sanynyń 26 paıyzyn jastar quraıdy. Sondyqtan da jastardy jumyspen qamtý jergilikti bıliktiń basty nazarynda. Máselen, «Dıplommen aýylǵa» baǵdarlamasy boıynsha 905 jas maman, «Jastar praktıkasy» boıynsha 5204 jas jumysqa ornalasty. Al «Serpin» baǵdarlamasy boıynsha bólingen 15 myńnan astam memlekettik granttyń 50 paıyzy nemese 7587-si Ońtústik jastaryna tıesili. Memlekettik baǵdarlamalardy paıdalanýshy jastardyń sany da kúnnen kúnge artyp, 2015 jylmen salystyrǵanda 53,1 paıyzǵa artqan.
Erkin DOSYMBAI,
Ońtústik Qazaqstan oblysy