Mádenıet jáne sport mınıstrligi Tilderdi damytý jáne qoǵamdyq-saıası jumys komıteti Sh.Shaıahmetov atyndaǵy tilderdi damytýdyń respýblıkalyq úılestirý-ádistemelik ortalyǵynyń uıymdastyrýymen «Rýhanı jańǵyrý: jańa qazaq álipbıi jáne memlekettik baǵdarlamanyń oryndalý barysy» atty respýblıkalyq semınar ótti.
Jıynǵa ult rýhanııatynda orny bar zııaly qaýym ókilderi men belgili tiltanýshy ǵalymdar jáne atalmysh sala boıynsha óńirde qyzmet atqaryp júrgen jetekshi mamandar qatysty.
Basqosýǵa jınalǵan kópshilikti sharanyń maqsatymen tanystyrǵan Mádenıet jáne sport mınıstrligi Tilderdi damytý jáne qoǵamdyq-saıası jumys komıtetiniń tóraǵasy Qýat Borash Elbasy tarapynan ótken jyly qoǵamǵa joldanǵan «Bolashaqqa baǵdar: rýhanı jańǵyrý» atty baǵdarlamalyq maqalaǵa bir jyl tolýyna baılanysty aımaqtaǵy áriptesterdi jınap, buǵan deıin atqarylǵan ister men alda oryndalatyn josparly sharýalar jaıly aqyldasyp, keleli keńes ótkizýdi qup kórip otyrǵanyn jetkizdi.
– Búgingi semınar qazirgi tańda asa bir ózekti máselege aınalyp otyrǵan jańa qazaq álipbıine baılanysty uıymdastyrylǵany quptarlyq dúnıe, - dep sharanyń mánine qatysty betashar lebizin bildirgen Mádenıet jáne sport mınıstrliginiń jaýapty hatshysy Qýatjan Ýálıev bul retki talqylaýǵa usynylǵan másele ýaqyttyq turǵydan jasampazdyq mańyzǵa ıe bolýymen qatar jańa dáýirge tán elimizdiń bolashaq rýhanı baǵdaryn aıqyndaýǵa arnalǵan jıyn degendi atap aıtty.
Mańyzdy sharany uıymdastyrýshy Sh.Shaıahmetov atyndaǵy tilderdi damytýdyń respýblıkalyq úılestirý-ádistemelik ortalyǵynyń dırektory Erbol Tileshov, Elbasy N.Á. Nazarbaev ústimizdegi jyldyń 20 aqpanda «Qazaq tili álipbıin kırıllısadan latyn grafıkasyna kóshirý týraly» 2017 jylǵy 26 qazandaǵy №569 Jarlyǵyna ózgeris engizgen sátten bastap, qazaq tili álipbıin latyn grafıkasyna kóshirý jóninde Ulttyq komıssııa qurylyp, orfografııalyq, termınologııalyq, ádistemelik-tehnıkalyq jáne aqparattyq súıemeldeý jóninde jumys toptary jasaqtalyp, olardyń jumys erejesi bekitilip, iske kirisip ketkenin jetkizdi.
Semınar-keńes barysynda Qazaqstan Respýblıkasynda tilderdi damytý men qoldanýdyń 2011-2020 jyldarǵa arnalǵan memlekettik baǵdarlamanyń úshinshi kezeńindegi nysanaly ındıkatorlary boıynsha: memlekettik tildi meńgergen eresek turǵyndardyń; memlekettik tildi V1 deńgeıinde meńgergen mektep túlekteriniń; memlekettik buqaralyq aqparat quraldaryndaǵy qazaq tilindegi kontenttiń; qazaq tiliniń rettelgen termınologııalyq qorynyń; respýblıkadaǵy orys tilin meńgergen eresek turǵyndardyń; ulttyq mádenı birlestikter janyndaǵy ana tilderin oqytatyn kýrstarmen qamtylǵan etnostardyń; respýblıkada aǵylshyn tilin meńgergen turǵyndardyń; úshtildilik saıasatyn ıgergen turǵyndardyń úlesi men onomastıka máseleleri jaıly keńinen saraptaldy.
Kezekti tyńdalǵan baıandamalar barysynda jańa ulttyq álipbıge kóshý kezeńderiniń daıarlyǵy týraly, osy oqıǵaǵa baılanysty qoǵamdyq kózqaras pen ǵylymı tujyrymdar jaıly, memlekettik tildi oqytýdyń ádistemelik bazasyn jetildirý jáne standarttaý isi, sondaı-aq til úırenýshilerge qatysty leksıkalyq qordy ǵylymılandyrý sharasy, shet tilderin úıretýdiń mańyzyna qatysty máseleler talqylandy.
Sonymen qatar basqosý barysynda aımaqtardan kelgen mamandardyń da pikirleri tyńdalyp, óńirlerde latyn grafıkasyna kóshý barysynda týyndaıtyn suraqtar da ortaǵa tastalyp, olardy sheshý joldary usynyldy. Jıyn sońynda alda atqarylar jumystyń jospary tanystyrylyp, odan kútiletin nátıjeler belgilendi.
Beken QAIRATULY,
«Egemen Qazaqstan»