Ortalyq kommýnıkasııalar qyzmetinde Memlekettik qyzmet isteri jáne sybaılas jemqorlyqqa qarsy is-qımyl agenttigi tóraǵasynyń orynbasary Aıgúl Shaıymovanyń jáne «Rýhanı jańǵyrý» baǵdarlamasynyń «О́zgeristerdi ózińnen basta» atty ishki baǵdarlamasynyń bas menedjeri Shyńǵys Tóregeldınniń qatysýymen baspasóz konferensııasy ótti.
Qazirgi tańda «100 naqty qadam» Ult jospary sheńberinde memlekettik qyzmetti reformalaýdyń úshinshi kezeńi júrgizilýde. Aıgúl Shaıymovanyń aıtýynsha, Ult jospary júzege asyrylǵaly beri mansap satysymen qyzmette joǵarylaǵan qyzmetkerlerdiń sany 4 ese ósken. Áleýmettik saýaldamalardyń nátıjeleri boıynsha respondentterdiń 77 paıyzynan astamy kadrlyq sheshimderdiń qabyldanýy kezinde merıtokratııaǵa senedi, al 2001 jyly bul kórsetkish 39 paıyzy ǵana bolǵan. Básekelestikten tys taǵaıyndaýlar, ıaǵnı «komandalyq aýys-túıister» 19 esege qysqartylǵan. Aýqymdy aldyn alý jumystarynyń arqasynda etıkalyq quqyq buzýshylyqtardyń sany azaıǵan. Máselen ótken jyly 2015 jylmen salystyrǵanda olardyń sany 43 paıyzǵa (354-ten 202-ge deıin) tómendegen.
Sarapshylardyń baǵalaýy boıynsha, búgingi tańda qazaqstandyq memlekettik qyzmet salasy halyqaralyq standarttarǵa sáıkes keledi. «Búgingi kúni memlekettik qyzmetkerlerdiń ortasha jasy – 39 jas, al 1991 jyly ol 44 jas bolǵan. Memlekettik qyzmetshilerdiń sapalyq quramy ósti. Qazaqstanda damyǵan elderdiń jetistikterin ulttyq memlekettik júıeniń erekshelikterimen biriktiretin ózindik model quryldy dep senimmen aıta alamyz. Bul nátıjelerge biz Memleket basshysynyń kóregen saıasatynyń arqasynda qol jetkizdik», dedi jıynda A.Shaıymova.
Baspasóz máslıhaty qorytyndysynda Aıgúl Shaıymova memlekettik qyzmetshiler kúni qarsańynda búkil el boıynsha «Úzdik memlekettik qyzmetshi» ataǵyna irikteý ótkizilip jatqanyn atap ótti. Ol ár qyzmetkerdi azamattardy áleýmettik turǵyda qoldaýǵa úles qosýǵa shaqyrdy.
Raýan QAIDAR,
«Egemen Qazaqstan»