Elbasy Nursultan Nazarbaevtyń «Bolashaqqa baǵdar: rýhanı jańǵyrý» baǵdarlamalyq maqalasynan týyndaıtyn maqsattar men mindetterdi júzege asyrý aıasynda Jambyl oblysynda búginde júıeli jumystar júrgizilýde. Atap aıtsaq bulardyń bári «Týǵan jer», «Kıeli jerlerdiń geografııasy», «100 jańa kitap», «Qazaqstannyń 100 jańa esimi», «Qazaq tilin latyn grafıkasyna kóshirý», «Zamanaýı qazaqstandyq mádenıet jahandyq álemde» arnaıy jobalary aıasynda júzege asyrylyp keledi.
Elbasynyń «Rýhanı jańǵyrý» baǵdarlamasy aıasynda ótken jyly jergilikti bıýdjet esebinen 197 mıllıon, al demeýshiler esebinen 898 mıllıon teńgege túrli jobalar men is-sharalar uıymdastyryldy. Atalǵan baǵdarlamanyń 4 kishi baǵyty «Tárbıe jáne bilim», «Rýhanı qazyna», «Atameken» jáne «Aqparat tolqyny» boıynsha 22 joba qolǵa alynyp, túrli is-sharalar ótkizildi. Sonymen qatar, «Týǵan jer» arnaıy jobasy boıynsha ótken jyly óńirde «Týǵan jerge týyńdy tik!» aksııasy ótkizilip, mesenattardyń tizimi men olar halyqqa paıdalanýǵa beretin nysandardyń tizbesi jasaqtaldy. Nátıjesinde mesenattar men aýdan ákimderi arasynda memorandýmǵa qol qoıylyp, bıyl jalpy quny 3,1 mıllıard teńgege 38 áleýmettik nysan el ıgiligine berilip, aýyldar abattandyrylatyn bolady. Al aǵymdaǵy jyly jalpy quny 3,6 mıllıard teńgege 78 kishi joba men 53 is-shara josparlanyp otyr. Onyń ishinde 510,5 mıllıon teńge jergilikti bıýdjet esebinen, al 3,1 mıllıard teńge mesenattar esebinen qaralǵan. Sonymen qatar, «Qazaqstannyń sakraldy geografııasy» jobasy aıasynda Jambyl oblysynan bul tizimge Merke-Jaısan túrki ǵuryptyq kesheni, Aqyrtas kesheni, «Ejelgi Taraz qalashyǵy», «Tekturmas» kesheni, «Qarahan», «Aısha bıbi», «Babadja Hatýn» jáne «Baızaq batyr Mámbetuly» keseneleri sııaqty 8 tarıhı oryn engizilgen. Bıyl óńirdegi sakraldy oryndardy nasıhattaý maqsatynda 121,7 mıllıon teńgege 8 joba júzege asyrylatyn bolady.
Sondaı-aq, aldaǵy mamyr aıynda «Áýlıeatanyń kıeli jerleri» kishi jobasy aıasynda óńirdegi tarıhı oryndardyń elektrondy kartasy jasalady. Bul maqsatqa oblystyq mádenıet, arhıvter jáne qujattama basqarmasynan 25 mıllıon teńge qarastyrylýda. Aǵymdaǵy jyldyń ekinshi jartyjyldyǵynan bastap «Aısha bıbi» vıdeorolıgi túsiriledi. Bul maqsatqa oblystyq týrızm basqarmasynan 52,8 mıllıon teńge qarastyrylýda.
Elbasynyń «Bolashaqqa baǵdar: rýhanı jańǵyrý» baǵdarlamalyq maqalasynan týyndaıtyn mindetterdi júzege asyrý aıasynda óńirde bıyl 474 mıllıon teńgege 7 mádenı sala boıynsha jáne 876,7 mıllıon teńgege 21 sport salasy boıynsha jobalar iske asyrylyp, 40-tan astam aýyldyń ınfraqurylymy jańǵyrtylady. Sonymen qatar ótken jyly oblysta «Bir sábı – bir aǵash» jobasy qolǵa alynyp, bir kúnde dúnıe esigin ashqan myń sábıge arnalyp 1000 túp aǵash otyrǵyzylǵan bolatyn. Atalǵan joba elimiz boıynsha úzdik jobalar qataryna enip, bıyl Astana qalasynda jalǵasyn tabady.
О́tken jyly elimizde «Qazaqstannyń 100 jańa esimi» jobasy qolǵa alynǵan bolatyn. Atalǵan jobaǵa Jambyl oblysynan 12 úmitker qatysyp, 8 azamat jeńimpaz atanǵanyn aıta ketý kerek. Sondaı-aq elimizdiń árbir azamaty oqýy tıis «100 jańa kitap» arnaıy jobasyn iske asyrý aıasynda óńirdegi joǵary oqý oryndarynan 39 ádebıet usynylyp otyr. Sonymen qatar «Qazaq tilin latyn grafıkasyna kóshirý» arnaıy jobasy aıasynda joǵary oqý oryndarynan latyn álipbıin oqytatyn arnaıy kafedralar ashylyp, «Latyn álipbıin oqytý» arnaıy oqytý kýrstary engizildi.
– О́tken jyly Taraz qalasyndaǵy Dostyq úıinde «Rýhanı jańǵyrý» baǵdarlamasynyń arnaıy jobalaryn iske asyrý, olardy bir jerge toptastyryp jumys júrgizý boıynsha ınteraktıvti alańdar ashylǵan bolatyn. Ondaǵy zamanaýı qurylǵylar arqyly baǵdarlama aıasyndaǵy jobalardyń ınteraktıvti bazasymen tanysýǵa, belgili aqyn-jazýshylardyń shyǵarmalaryn elektrondy nusqada oqýǵa, olardyń aýdıojazbalaryn tyńdaýǵa, latyn álipbıin jáne aǵylshyn tilin úırenýge múmkindik jasalǵan, – deıdi oblystyq ishki saıasat basqarmasynyń basshysy Ǵalııa Boranbaeva.
Aıta keteıik, Elbasynyń «Bolashaqqa baǵdar: rýhanı jańǵyrý» baǵdarlamalyq maqalasyn júzege asyrý aıasynda osyndaı ortalyqtar Taraz qalasy men aýdandardyń 256 orta mektebinde, 25 kolledjde ashylǵan. Interaktıvti alańdar arqyly aýdandarda ashylǵan ortalyqtarmen tikeleı baılanysqa shyǵyp, kez kelgen ýaqytta túrli is-sharalar uıymdastyrýǵa bolady.
Hamıt Esaman,
«Egemen Qazaqstan»
Jambyl oblysy