Oblystyq ishki ister departamenti baspasóz qyzmetiniń taratqan málimetterine súıensek, qaıǵyly oqıǵa 15 sáýir kúni keshki saǵat 9 shamasynda Aıdarhanov kóshesiniń boıynda oryn alǵan.
«BMW X5» kóligin tizgindegen azamat jol boıymen ketip bara jatqan 1999 jyly týǵan jaıaý júrginshini qaǵyp ketken. «Jaıaý júrginshi jedel járdem kóligi jetkenshe oqıǵa ornynda qaza tapqan. Oqıǵany tekserý barysynda 45 jastaǵy «BMW X5» kóliginiń júrgizýshisi Rıdder qalasy ákiminiń orynbasary Baýyrjan Qurmanbaev ekendigi anyqtaldy. Rıdder qalasy IIB QR QK 345 babynyń 3 bóligi boıynsha sotqa deıingi tergep-tekserý sharalaryn bastady. Oblys ákiminiń tapsyrmasyna sáıkes jol-kólik oqıǵasyn tergeý ShQO Ishki ister departamenti bastyǵynyń tikeleı baqylaýyna alyndy» delingen departamentiń baspasóz qyzmetiniń taratqan málimetinde.
Búgin qaıǵyly jaǵdaıdyń mán-jaıyn anyqtaý úshin oblys ákiminiń apparat basshysy Rınat Omarov Rıdder qalasyna arnaıy baryp, qala ákimimen birge qaıtys bolǵan jigittiń ata-anasyna kóńil aıtyp shyqty.
Azamat QASYM,
«Egemen Qazaqstan»
Shyǵys Qazaqstan oblysy,
Rıdder