Úkimet basshysynyń birinshi orynbasary Asqar Mamın jumys saparymen Qytaı Halyq Respýblıkasyna bardy. Sapar aıasynda A.Mamın birlesken ınvestısııalyq jobalardy júzege asyrý maqsatynda iri qarjy, óndiris, kólik-logıstıka korporasııalarynyń basshylarymen ekijaqty kezdesýler ótkizdi. Bul týraly Úkimettiń baspasóz qyzmeti habarlady.
– Qazaqstan Prezıdenti N.Nazarbaev pen QHR Tóraǵasy Sı Szınpınniń arqasynda eki el arasynda joǵary deńgeıdegi yntymaqtastyq ornady. «Nurly jol» jáne «Uly Jibek joly ekonomıkalyq beldeýi» baǵdarlamalary Qazaqstan men Qytaı arasyndaǵy ınvestısııalyq qarym-qatynastarǵa jol ashady, –dep atap ótti kezdesý barysynda A.Mamın.
Premer-Mınıstrdiń birinshi orynbasarynyń Beıjińdegi kezdesýlerinde Export and Import bank of China, China Construction Bank, Industrial and Commercial Bank of China Limited sııaqty iri bankterdiń basshylarymen ınvestısııalyq jobalardy qarjylandyrý máseleleri talqylandy. Sonymen qatar Qazaqstan aýmaǵy arqyly tranzıttik konteınerlik tasymaldaý kólemin ulǵaıtý, «Qorǵas-Shyǵys qaqpasy» ındýstrııalyq habyn damytý, kedende júkterdi esepteýdiń jańa tehnologııalaryn engizý, sondaı-aq Halyqaralyq shekara mańy yntymaqtastyǵy ortalyǵy qyzmetterin jetildirý máseleleri de qaraldy.
A.Mamın Lıanıýngan qalasynyń merimen osy qalanyń porty men Qorǵas beketi arasyndaǵy birlesken termınaldy damytý máselesin talqylady. Sonymen qatar iskerlik kezdesýler aıasynda, «Gener Tec» kompanııasymen birlesip Qazaqstandaǵy avtomobıl qurastyrý jumystaryn damytý, «China National Building Material Group» kompanııasymen birlesip shyny zaýyty jobasyn júzege asyrý joldary qarastyrylyp, munaı-hımııa, energetıka, ken óndirý kompanııalarymen kelissózder júrgizildi.