Naǵashysyna tartqan jıender

2016 jyldyń tamyz aıynda Bra­zılııanyń Rıo-de-Janeıro qalasynda ótken Olımpııa oıyndaryn tamashalap otyryp, qyzyqty bir jaıtqa qanyq boldyq. Jaǵajaı voleıbolynan jarys ótip jatty... Sol dodada Italııa qurama komandasynyń músheleri – Paolo Nıkolaı men Danıele Lýponyń óneri kópshiliktiń kóńilinen shyqty. Barlyq qarsylastaryn qoǵadaı japyrǵan olar jartylaı fınalda Reseı juldyzdary – Vıacheslav Krasılnıkov pen Konstantın Semenovqa san soqtyryp, aqtyq aıqasqa joldama aldy. Fınalda brazılııalyq Alıson Serýttı men Brýno Oskar Shmıdten utylǵan Apennın túbeginiń túlekteri kúmis medaldi ıelendi.

Aıtpaǵymyz, Olımpıadanyń kúmis júldegeri atanǵan Danıele Lýponyń (sýrette) anasy qazaq eken. Danıele 1991 jyldyń 6 mamyrynda Rımde dúnıege keldi. Anasynyń aty-jóni – Gúlsim Jumaǵulova. Ataqty sportshynyń áke-sheshesi 1980 jyly Máskeýde Olımpııa oıyndary ótip jatqan kezde tanysypty. Ol kezderi Gúlsim apaıymyz KSRO astanasyndaǵy ınstıtýttardyń birinde oqyp júrgen. Eki jastyń sezimi mahabbatqa ulasyp, qazaq qyzy Karlo Lýpomen birge Apennın túbegine attanady.

Bul kúnderi jıenimiz jaǵajaı voleıbolyndaǵy marqasqalardyń biri ári biregeıine aınalyp otyr. Onyń boıy – 194 santımetr, salmaǵy – 77 kılo. 2012 jylǵy London Olımpıadasynda Italııa quramasy shırek fınalǵa deıin jetti. О́ziniń komandalyq áriptesi Paolo Nıkolaımen birge Danıele Lýponyń eki ret Eýropa chempıony atanyp, birqatar asa iri halyqaralyq jarystarda jeńis tuǵyryna kóterildi.

2013 jyly Almatydaǵy Balýan Sholaq atyndaǵy sport saraıynda boks­shy­lardyń álem chempıonaty dúrki­rep ótkeni esimizde. Jergilikti jankúıer­ler óz jerlesterine barynsha qoldaý kórsetip, kún saıyn olardy ji­ger­lendirip otyrdy. Sondaı-aq qazaq­standyq kórermenderdiń ázerbaı­jandyq Teımýr Mamedov pen reseılik Artem Chebotarevqa da yqylasy erekshe boldy. Sebebi olar da bizdiń jıenderimiz. Álem chempıonatynyń qola júldegeri atanǵan qos sańlaqtyń analary – qazaqtyń qarapaıym qyzdary.

Teımýrdyń ata-anasy Shymkentte týyp, ósti. Ekeýi osy jerde tanysyp, Keńes Odaǵynyń irgesi sógilgennen keıin Qap taýy bókterine qonys aýdardy. 1993 jyldyń 11 qańtarynda Teımýr dúnıege keledi. Otaǵasy Fızýlı de kezinde táýir boksshy bolǵan kórinedi. 13 jasynda ol ulyn boks úıirmesine jetektep ákeledi. Jastar arasyndaǵy jarystarda jasyndaı jarqyraǵan jigerli óren eresekter dýyna da erkin qosylyp, túrli dodalarda daralana bastaıdy.

91 kılo salmaqta óner kórsetetin Mamedov 2012 jyly London Olımpıa­dasynyń kúmis medalin moınyna taqty. 2011 jyly Baký jáne 2013 jyly Almatydaǵy álem chempıonatynda júldegerler qatarynan kórindi. 2011 jyly Eýropa birinshiliginde top jarsa, 2013 jyly aıtýly jarysty kú­mispen qorytyndylady. Al 2015 jyly Ázerbaıjannyń astanasynda tuńǵysh ret uıymdastyrylǵan Eýropa oıyndarynda Teımýrǵa teń keler eshkim bolǵan joq.

Artem Chebotarev 1988 jyldyń 26 qazanynda Saratov oblysynda dúnıege keldi. Ákesiniń esimi – Nıkolaı, anasy – Dına. Boks álippesin ol naǵashysy Edilbaı Qazıevten úıre­nedi. 75 kılo salmaq dárejesinde judyryq­tasqan Artem 4 ret Reseı chempıony atanyp, 2010 jyly Máskeýde ótken Eý­ropa birinshiliginde altyn tuǵyrǵa kóterildi. 2013 jyly Almatyda jalaýy jelbiregen álem chempıonatynyń jartylaı fınalynda ırlandııalyq Djeıson Kýıglıge jol berip, qola medaldi ıelendi. 2016 jyly Rıo Olımpıadasyna qatysqanymen, bul jarysta onyń joly bolmady.

Byltyrdan beri Artem kásipqoı rıngte baq synap júr. Sol aralyqta tórt ret sharshy alańǵa kóterilgen ol barlyq básekede basymdyq tanytyp, úsh qarsylasyn esinen tandyrdy. Jıenimizdiń endigi armany – kásipqoı bokstaǵy eń beldi nusqalardyń biri bo­ıynsha álem chempıony ataný.

Qysqa qaıyrsaq, sport áleminde esimi kópshilikke jaqsy tanys jıen­derimizdiń júrip ótken jeńisti joldary osyndaı. Qazirgi kezde de qazaq jan­kúıerleri olardyń jolyna úlken úmit­pen qarap, árkez tilekshi bolýda. О́ıt­keni jıenderimizdiń jeńisi bizge de ortaq!

Ǵalym SÚLEIMEN, «Egemen Qazaqstan»