...jańalyǵyn jetkizedi
Kásipkerler sport keshenin salyp berdi
Táýelsizdigimizdiń mereıli merekesine oraı Mańǵystaý aýdanynyń Aqshymyraý aýylynda Qaralda balýan atyndaǵy jańa sporttyq keshen paıdalanýǵa berilip, el-jurt rızashylyqqa bólengen bolatyn.
Jańa nysannyń jalpy kólemi 1 200 sharshy metr. Kásipkerler qurylysyna 30 mln teńgeden astam qarajat bólipti. Voleıbol, boks pen qazaqsha kúreske arnalǵan zaldan basqa jattyǵý zaly da qarastyrylǵan. Kıim aýystyratyn jáne jýynatyn bólmeleri bar.
Jasóspirimderdiń osy armanyn júzege asyrý úshin «Jańa adym» qoǵamdyq qaıyrymdylyq qory quryldy. Kásipkerlerdiń qoldaýymen jáne aýyl turǵyndarynyń aýyzbirshiliginiń arqasynda Qaralda balýan atyndaǵy zamanaýı sporttyq keshen qurylysyn bastaý týraly biraýyzdan sheshim qabyldandy. Eger taǵy da demeýshiler tabylsa, dzıýdo men sambo seksııalaryn ashpaqshy. Qazirgi tańda Mańǵystaý aýdanynda 3 myńnan astam jasóspirim sportpen shuǵyldanady.
Dúısenbek SÁDIǴULOV Mańǵystaý oblysy
...usynys jasaıdy
Astanamyzdyń mártebesin asqaqtataıyq
Astana qalasy táýelsizdigimizben birge jasap, gúldengen, sán-saltanaty jarasqan álemge áıgili qalalardyń qataryna qosyldy. Elbasynyń tikeleı basshylyǵymen ári qoldaýymen dúnıejúzilik deńgeıdegi salıqaly jıyndar men forýmdar osynda ótip, Qazaq eliniń, onyń astanasynyń mártebesi aıdaı álemge pash etilýde. Elordamyz arqyly álem jurtshylyǵy táýelsiz Qazaqstandy jaqynyraq tanyp, erekshe qurmetteıtin boldy. Otandastarymyzdyń da Astanaǵa degen yqylasy, súıispenshiligi sheksiz.
Birde «Egemen Qazaqstan» gazetinde mynadaı usynys jasaǵan bolatynbyz: «Buryndary Almatyǵa júrdek poıyz kelip jaqyndaǵanda biz Qazaqstan Respýblıkasynyń astanasyna keldik dep habarlama jasalyp, memlekettik ánuran oınalatyn. Sol bir sát káriniń de, jastyń da júregin erekshe bir áserge bólep, qýanysh sezimine bóleıtin. Endeshe búgingi Astanamyzdyń da mártebesin asqaqtatý úshin osy bir mereıli rásimdi qaıta jandandyrý kerek sııaqty. Bizdińshe jaqsy nárseni jańǵyrtqannyń nesi aıyp. Táýbe deıik, Alla bizge únemi jaqsylyq bergeı».
Oıymyzdyń tobyqtaı túıini – Astana qalasyn qazaq ultynyń brendine aınaldyrý búkil elimizge de, óskeleń urpaqqa da úlgi-ónege bolar edi.
Aıdos ÁBÝTÁLIPULY, Eńbekshilder aýdanynyń qurmetti azamaty
Kókshetaý
...súısinisin bildiredi
Kıeli Táýelsizdik nury
Táýelsizdik tańy atqaly beri biz kóptegen jetistikter men talaı belesterdi baǵyndyryp, eleýli tabystarǵa qol jetkizdik. Bizdiń aldymyzda áli de jeńip shyǵar qıyndyqtar men baǵyndyrar bıik shyńdar jeterlik. Áýeli bizder sanaly da tárbıeli, bilimdi de jigerli bolǵanda ǵana aldymyzdaǵy san taraý joldar men qamaldardy alyp, bıik maqsatqa jete alamyz. Árbir azamat eliniń ótkenin únemi jadynda saqtap, erteńgi bolashaǵyna senimmen qadam basýy tıis. Bilim, óner qýǵan jastarǵa elimizde esh shekteý joq. Demeý berip, bolashaqta bilikti maman bolýǵa kómek zor. Osynyń barlyǵy – Qazaqstannyń táýelsiz el bolýy men Elbasymyzdyń kemeńger saıasatynyń arqasy. Sondyqtan berilgen bar múmkindikti molynan paıdalanyp, Otanymyzǵa adal eńbek etip, Qazaqstandy bıikke jeteleıik.
Aıman NAZARBEKQYZY
Qyzylorda oblysy,
Jańaqorǵan aýdany
...oı bólisedi
Aq pen qara
Abaı atamyz balasy Ábdiraxmandy synaý úshin «Aq tús jaqsy ma, joq álde qara tús jaqsy ma?» dep surapty desedi. Ábdiraxman «Aq tús» jaqsy degende, Abaı atamyz oǵan qarsy shyǵyp: «Qara tús jaqsy. Adam balasy qaıratty, kúshti, qýatty kezinde shashy qara bolady. Jas balanyń shashy aǵaryp ketse, onda ásemdikten, ádemilikten belgi de qalmaıdy. Aq qaǵazǵa da xat qara sııamen túsedi. Adam balasy ózi ardaq tutqan qadirli zatyn kóziniń qarashyǵyndaı saqtaıdy. Sondyqtan qara tús jaqsy» degen yńǵaıda áńgime aıtady.
Sonda Ábdiraxman: «Siz ony qalaı bildińiz?» dep suraıdy. Abaı atamyz: «Men ony aqylymmen, mıymmen, sanammen bildim» deıdi. Ábdiraxman: «Siz sol aqyl-oı men sanańyzdyń túsin qandaı dep oılaısyz?» degende, Abaı atamyz: «Aq qoı, aq» dep kúlgen eken.
Aq pen qara. Máńgilik teketires. Ańyz áńgime, ertegilerde qara ylǵı basymdyqqa ıe bolyp keledi de, sońǵy sátte aq áıteýir jeńis tuǵyryna kóteriledi. Mán bersek, adam balasy da osyndaı teketiresti, qaıshylyqty ómir keshedi. Sol arpalyspen ómir de sońǵy mejege taıaıdy. О́mir atty maıdannan taıaǵyna súıengen qarııa ilbı basyp shyǵyp kele jatady. Boıynda ál de, kúsh te, qýat ta qalmaǵan. Biraq, saqal-shashy áppaq. Demek ol ómir maıdanynda jeńiske jetti. Qaradan aqtyń ústem turatynyn dáleldedi. Alaıda qarttyqqa jasalar qurmette onyń dárejesi men baılyǵy qaperge alynbaýy tıis. Dinimizde jasy kelgen adamǵa onyń kim bolǵanyna qaramastan qurmet kórsetiledi.
Iá, biz de qarttarymyzdy qazyna kórip, qurmetteımiz. Bizdiń aq shashty kúmiske balaıtynymyz bar. Shyntýaıtyna kelgende ol – nur ǵoı. Allanyń nury. Qarttardyń qazyna bolatyndyǵy sondyqtan.
Qudııar BILÁL
...úlgi tutady
Sharapatty jandar kóbeıe bersin
О́kinishke qaraı keıbir balada aqyl-oı sezimi damymaı qalady. Oǵan tuqym qýalaýshylyq, qorshaǵan ortanyń ekologııalyq áseri, otbasynyń áleýmetik jaǵdaıy syndy sebepter áser etedi. Sońǵy málimetterge qaraǵanda, elimizde 140 myńnan astam múmkindigi shekteýli bala ómir súredi eken. Olardyń 74 myńy – múgedek. Mundaı balalar elimizdiń barlyq aımaǵynda bar.
Almaty qalasynyń Jetisý aýdanynda kemtar balalar men 18 jastan asqan múgedekterge áleýmettik kómek berý sharalary júıeli túrde uıymdastyrylyp turady. Bul máseleni Jumyspen qamtý jáne áleýmettik baǵdarlamalar bólimi atqarady. Bólim qyzmetkerleri qoǵam nazaryn aýdarý úshin demeýshiler izdeıdi, túrli mekemelerge hat jazyp, ıgilikti iske muryndyq bolýǵa shaqyrady. Qýanyshtysy, sońǵy jyldary kemtar balalarǵa kómek qolyn sozǵan jandar qatary artyp keledi. Al atyn atamaýdy ótinetin, múmkindigi shekteýli balalarǵa jasaǵan kómegin dabyra qylǵysy kelmeıtin keńpeıil adamdar qanshama! Olarǵa Jaratqannyń nury jaýsyn deımiz. О́ıtkeni múgedekti músirkeý – saýap. Sharapatty jandar kóbeıgen saıyn múgedektiń de muńy seıile beredi.
Baǵdat ESEEVA, áleýmettik qyzmetker
Almaty