Búginde elimizde óndiris jáne aýyl sharýashylyǵy sıpatyndaǵy jármeńkeler jıi ótkizilip júr. Bos jumys oryndary jármeńkesi degen uǵym da ornyǵa bastady. Aqtóbede solardyń birde-birine uqsamaıtyn «Serpin» jármeńkesi ótkizildi. Ony ózge jármeńkelerden daralap turǵany – oǵan sottalǵandardyń qolynan shyqan 500-den astam qolóner buıymdary qoıylǵanynda.
Kózdiń jaýyn alyp, kórgen jandy tańǵaldyratyn dúnıeler Aqtóbe qalasyndaǵy qylmystyq atqarý júıesi mekemesinde ázirlengen. Qaısysyn qalap, satyp alǵyńyz keledi – patsha kóńilińiz bilsin. Sheber qoldyń izderi aıqyn kórinip turǵan shedevrler aǵash pen metaldan, ózge de qurylys materıaldarynan jasalǵan. Sondaı-aq tigin ónimderiniń júzdegen túrinen jobalanǵan, qaı-qaısysy da sándi ári sapaly deýge bolady. «Serpin» jármeńkesine kelgender úı men turmysqa qajetti kıim-keshekterdi, esikter men besikterdi, kádesyılar men qobdıshalardy, qazaqsha ázirlengen et salatyn astaýlardy, nardy men shahmat taqtalaryn attaı qalap satyp alyp jatty.
Sheberdiń qoly ortaq demeı me dana halqymyz. «Eńbek» RMK-ge qarasty «Eńbek-Aqtóbe» fılıalynda jumys jasap júrgenderdiń eńbegi qala turǵyndarynyń bir kádesine jarap jatsa, buǵan tek qol soǵý kerek shyǵar.
Ekinshi bir oı, bul kórinistiń ózi eńbekpen túzeý mekemesiniń jazasyn ótep júrgenderdi eńbekke tarta bilýiniń oń mysaly bolyp tabylady.
Respýblıka óńirlerindegi «Eńbek-Aqtóbe» sıpatyndaǵy qurylymdar úkimetke qomaqty salyq kólemin tólep otyrǵanyn aıta ketken jón. Tipti bul kásiporynda jumys isteıtinder sottaldy demeseńiz, kádimgi erkindiktegi er-azamattar sekildi jalaqy alatynynyń ózi nege turady. Buǵan óńirdegi eńbekpen túzeý mekemeleriniń janynda eki kolledj bar ekenin qosa aıtqan oryndy. Munda 150-den astam sottalýshy jumysshy mamandyǵy boıynsha bilim alyp júr eken.
Endeshe osynaý jaǵymdy jaıttardyń ózi aıaǵyn shalys basqan jandardyń qalypty ómirge qaıta oralýynyń oń belgisi bola alady demekpiz.
Temir QUSAIYN, «Egemen Qazaqstan»
AQTО́BE