Elordada qazaq álipbıin latyn qarpine kóshirý máselelerine arnalǵan biliktilikti arttyrý kýrstary jalǵasýda, dep habarlaıdy Astana ákimdiginiń resmı saıty.
Shara «Rýhanı jańǵyrý» baǵdarlamasynyń aıasynda ótip jatyr. 16-18 sáýir aralyǵynda joǵary jáne orta kásibı oqý oryndarynyń muǵalimderi, elorda mektepteriniń qazaq tili pániniń muǵalimderi latyn qarpine negizdelgen qazaq tilinde jazýdyń erejeleri, shetel sózderin jazý erjeleri boıynsha dáris alady.
Búgin «Isker» bıznes ortalyǵyndaǵy dáriste Astana qalasy ákiminiń orynbasary Ermek Amanshaev bolyp qaıtty.
Onyń aıtýyna qaraǵanda, mundaı kýrstar turaqty túrde júrgizilmek.
«Biz mundaı dáristermen qalanyń barlyq muǵalimderin qamtıtyn bolamyz. Oqytý 3 kezeńnen turady. Árıne, ońaı bolmasy anyq. Ýaqyt óte kele latyn qarpindegi qazaq álipbıiniń jańa nusqasyna qoǵam úırenip ketedi dep oılaımyn. Bizdiń basty maqsatymyz – qoǵamdy álipbıdiń jańa nusqasymen tanystyryp qana qoımaı, durys jazýdy úıretý», - dep atap ótti ákimniń orynbasary.
Aıta keteıik, dáristi Ahmet Baıtursynov atyndaǵy til bilimi ınstıtýtynyń professory, fılologııa ǵylymdarynyń doktory Álimhan Júnisbekov, S. Demırel atyndaǵy ýnıversıtettiń professory, fılologııa ǵylymdarynyń doktory Quralaı Kúderınova men Sh. Shaıahmetov atyndaǵy tilderdi damytýdyń respýblıkalyq úılestirý-ádistemelik ortalyǵynyń dırektory Erbol Tileshov oqıdy.
Shara tilderdi damytý jáne muraǵat isi basqarmasynyń muryndyq bolýymen ótti. Kýrstyń qorytyndysy boıynsha elordanyń joǵarǵy oqý oryndary men kolledjderiniń, mektepteriniń muǵalimderine biliktilikti arttyrý kýrstarynan ótkendigi jónindegi sertıfıkattar tabystalady.