Parlament Senaty Halyqaralyq qatynastar, qorǵanys jáne qaýipsizdik komıtetiniń tóraǵasy Darıǵa Nazarbaeva bastaǵan komıtet músheleri Soltústik Qazaqstan oblysynda kóshpeli otyrys ótkizdi.
Darıǵa Nazarbaeva memlekettik organdar ókilderimen áskerı bilim máseleleri jónindegi kezdesýdi asha kelip, áskerı bilim berý júıesin jetildirý sharalary belgilengen Qazaqstan Respýblıkasynyń Áskerı doktrınasyna nazar aýdardy. Senator áskerı mamandardy daıarlaýdyń qazirgi túrleri men ádisteri ózgerissiz qala berýi múmkin emestigine toqtalyp, olar memlekettiń áskerı uıymdarynyń talaptary men mindetterine saı kelýi, tipti odan da ozyq bolýy yqtımal ekenin aıtty.
«Áskerı oqý oryndaryna qoıylatyn basty talap – Qarýly Kúshterdi, basqa da áskerler men áskerı quralymdardy barlyq deńgeıdegi jáne túrli mamandyqtar boıynsha, ulttyq áskerdiń jaýyngerlik daıyndyǵy jónindegi mindetterdi tıimdi sheshe alatyn joǵary bilikti áskerı qyzmetkerlermen jasaqtaýdy qamtamasyz etý bolyp qala beredi», - dep atap ótti komıtet tóraǵasy.
Senatorlar S.Kırov atyndaǵy, «ZIKSTO», Petropavl aýyr mashına jasaý zaýyttarynyń óndiris sehtarynda boldy. Depýtattar odan basqa Ulttyq ulannyń Áskerı ınstıtýtynyń jumysymen tanysty.
Halyqaralyq qatynastar, qorǵanys jáne qaýipsizdik komıtetiniń músheleri elimizdiń UQK Shekara qyzmetindegi memlekettik shekarany kúzetý mindetin atqaratyn №2032 áskerı bóliminiń qyzmeti jaǵdaıymen de tanysty.
Shekara qyzmetiniń «Soltústik» aımaqtyq basqarmasy bastyǵynyń mindetin ýaqytsha atqarýshy Jánibek Tólebaev jaýapty aımaqtaǵy Memlekettik shekarany kúzetýde qalyptasqan jaǵdaı men ony uıymdastyrý tártibi, sondaı-aq atqarylǵan jumystar men ózekti máseleler týraly egjeı-tegjeıli baıandady.
Qyzmettik-jaýyngerlik is-qımyl nátıjeleri soltústik baǵyttaǵy quqyq buzýshylyqtardyń azaıyp kele jatqanyn kórsetip otyr.
№2032 áskerı bólimniń komandıri podpolkovnık Rýslan Qoqambaev depýtattarǵa qazirgi kezdegi Shekara mekemesinde memlekettik shekarany kúzetýde qoldanylatyn qarýlar men tehnıkalyq quraldar úlgilerin kórsetti.
Senatorlar memlekettik shekarany kúzetý Aımaqtyq basqarmasynyń bólimshesinde – «Qaraqoǵa» shekara zastavasynda jáne shekara baqylaý bóliminde de boldy.
Parlament Senaty Halyqaralyq qatynastar, qorǵanys jáne qaýipsizdik komıtetiniń músheleri qazaqstandyq shekarashylardyń qyzmettik-jaýyngerlik is-qımyldaryna joǵary baǵa berdi.