Búgin astana ákimdiginde qala ákimi Áset Isekeshevtiń tóraǵalaǵymen kezekti apparattyq jıyn ótti. Kún tártibinde – úlestik qurylys, jylý maýsymy, quqyqtyq tártip, kóshelerdi tazalaý máselesi qaraldy.
Túrǵyn úı qurylysyna úlestik qatysý máselesi boıynsha Astana qalasy ákiminiń birinshi orynbasary Sergeı Horoshýn baıandady.
«VAK-tyń sońǵy otyrysynda 26 nysan qaralyp, «Elorda qurylys kompanııasy» JShS atqarǵan jumystary týraly esebi tyńdaldy. Búginge deıin nysannyń qarjy jáne tehnıkalyq aýdıt jumystary jalǵasyp jatyr. TQK tóraǵasymen birge jetkilikti emes qujattardy jınaý jumystary júrgizilýde», - dedi S. Horoshýn.
Sondaı-aq, ol «Abat» TK nysany jańa «Intel KZ» JShS ınvestorymen qurylys jumystaryn birlesip aıaqtaý týraly kelisimge qol qoıyp, qurylys jumystaryn qaıta jańartty. «Altyn bosaǵa» TK paıdalanýǵa berildi. Qazir problemasy sheshilmegen 51 nysan bar.
Qalanyń aǵymdaǵy tynys-tirshiligi men tasqyn sý kezeńi men naryqtaǵy janar-jaǵarmaıdyń ahýaly týraly qala ákiminiń orynbasary Qosman Aıtmuhametov baıandady. Onyń aıtýynsha, ótken aptada juqpaly aýrýlar boıynsha sanıtarlyq-epıdemıologııalyq ahýal turaqty, jaǵdaı baqylaý deńgeıinen asyp ketpegen. Tasqyn sý ahýaly da astanada turaqty. Naryqta kómir men janar-jaǵarmaı kún saıyn monıtorıngten ótkizilip, únemi baqylaýda turady.
Dári-dármek pen onyń qory týraly jáne de Qazaqstan halyqtary birligi kúnin atap ótýdiń daıyndyǵy jaıynda qala ákiminiń orynbasary Ermek Amanshaev aıtyp berdi.
Osy arada qala ákimi óziniń orynbasarlaryna, aýdan ákimdikterine kóktemgi merekelerdi toılaý kezinde órtke qarsy jáne qoǵamdyq qaýipsizdikti, abattandyrý, jaqyn mańaıdyń bárin sanıtarlyq tazalaýdan ótkizýdi, sanıtarlyq normalardyń saqtalýyn, jol qozǵalysyn retteýdi jáne t.b. qamtamasyz etýdi tapsyrdy.
Al MJÁ jobasyn iske asyrý, smart-sıtı, «Sergek» beınebaqylaý kamerasyn qosý jónindegi jumystar, azyq-túliktiń baǵasy týraly qala ákiminiń orynbasary Malıka Bekturova málimdedi.
Astanadaǵy krımınogendi ahýal men quqyqtyq tártipti qamtamasyz etý boıynsha qabyldanǵan sharalar jóninde IID basshysy Marat Qojaev aıtyp shyqty.
Ol baıandamasynda azamattardy tirkeý máselesine toqtala ketti. Aıtýynsha, astanalyq polıseıler jalǵa beriletin baraktardy belsendi túrde tekserip, bir aptanyń ishinde 50 úı ıesi men 167 adamǵa mekenjaıǵa tirkelmegendigi úshin aıyppul saldy. Osy baǵytta jumystar jalǵasyp jatyr dedi ol.
Osy tusta Astana ákimi zań jolymen hostelderdiń de jumysyn retteýdi tapsyrdy. Onda hosteldiń jumysyn baqylaıtyn naqty normatıvtik qujattardyń joqtyǵyn, kóbinese osyndaı ǵımarattardyń kishigirim bolsyn qaýipsizdik normalaryn saqtaı bermeıtinin aıta ketti.
Osyǵan baılanysty Áet Isekeshev memorgandarǵa hostelderdiń jumysyn retteý úshin zańǵa ózgeris engizýdi zertteýin tapsyrdy. Ol kóppáterli turǵyn úılerden hostel ashý úshin turǵyndardyń kelisimi kerektigin aıtty.
Qaladaǵy qoǵamdyq kóliktiń jumysy týraly «Astana LRT» basqarmasynyń tóraǵasy Bekmyrza Igenberdınov aıtty.
Abattandyrý máselesi boıynsha Almaty, Baıqońyr, Esil, Saryarqa aýdandary basshylarynyń baıandamalary tyńdaldy.
Qaladaǵy saýda oıyn-saýyq ortalyqtaryn tekserý jumystary boıynsha jáne basqa da adamdar kóp jınalatyn oryndardaǵy órt qaýipsizdigi jóninde Tótenshe jaǵdaılar departamentiniń basshysy Barat Duzaqbaev baıandady.
Onyń aıtýynsha, 117 nysannyń 60 nysany tekserýden ótti. Tekserý barysynda 522 buzýshylyq anyqtalǵan. Jiberilgen buzýshylyqtar úshin 8 zańdy tulǵa ákimshilik jaýapkershilikke tartyldy.
«Saýda nysandaryn tekserý barysynda negizgi buzýshylyqtar órtke qarsy avtomatıkanyń isten shyǵýy, evakýasııa jolynyń jabyq bolýy, elektr symdary mehanıkalyq ádispen oryndalǵan», - dedi ol.
Odan basqa, 15 nysanǵa qatysty tekserýler tirkelip, jumystar jalǵasýda, olar «Han shatyr», «Saryarqa», «Evrazııa», «Astyqjan», MegaSilkway, t.b.
TJD basshysynyń baıandamasyn tyńdaǵan Astana ákimi Áset Isekeshev qaladaǵy saýda bazarlaryndaǵy órt qaýipsizdigi qanaǵattanarlyq emes ekenin aıtty. Osyǵan baılanysty bazarlardyń basshylary men qojaıyndaryna keshendi sharalar qabyldaý qajettigine shaqyrdy, eger shara qoldanbasa bazardy jaýyp tastaıtynyn eskertti.