Sátbaev qalasynda Qazaqstan halqy Assambleıasynyń XXVI sessııasy qarsańynda erekshe qajettilikteri bar 45 balaǵa kómek kórsetý maqsatynda «Meıirim shýaǵy» atty qaıyrymdylyq aksııasy ótti. Atalǵan ıgi shara Sátbaev qalasynyń 45 jyldyǵy men Astana qalasynyń 20 jyldyq mereıtoıyna arnaldy.
Shynbolat Dildebaev atyndaǵy mádenıet saraıynyń zalynda erekshe qajettilikteri bar balalar men olardyń ata-analarynyń shyǵarmashylyq jumystary arnaıy uıymdastyrylǵan kórmege qoıyldy. Shara barysynda bul jumystar satylymǵa shyǵarylyp, kóbi óz ıelerin tapty.
Jalpy, erekshe qajettilikteri bar balalar óte qaısar jáne shydamdy bolyp keledi. Taǵdyrdyń aýyr synyna ushyraǵan bul balaqaılardyń ómirge degen qushtarlyǵy adamdy eriksiz tánti etedi. Olar túrli qıyndyqtarǵa qaramastan, bı bılep, án aıtyp, sýret te salady.
Is-shara barysynda erekshe qajettilikteri bar 45 balaǵa 50 myń teńgeden arnaıy sertıfıkattar tabys etildi. Al Amantaı Erjanǵa eki bólmeli páterdiń kilti berildi. Marapattaý rásiminen keıin balalar óz ónerlerin kórsetip, jurtshylyqqa tamasha kóńil kúı syılady. Balalardyń saxnaǵa ár shyǵýyn kórermender erekshe rızashylyqpen qarsy aldy.
Atalǵan qaıyrymdylyq aksııasyna Qaraǵandy oblysy ákimi apparaty «Qoǵamdyq kelisim» KMM dırektory Erlan Qusaıyn, «Nur Otan» partııasynyń Qaraǵandy oblystyq fılıaly tóraǵasynyń birinshi orynbasary Qadısha Ospanova jáne Qaraǵandy oblystyq QHA janyndaǵy qaıyrymdylyq jasaýshylar men tálimgerler klýbynyń tóraǵasy Sergeı Vodko qatysty.
Qaırat ÁBILDA, «Egemen Qazaqstan»
Qaraǵandy oblysy, Sátbaev qalasy