Oral qalasyndaǵy «Sıtı sentr» oıyn-saýyq jáne saýda ortalyǵynyń ıesi Oral qalalyq mamandandyrylǵan ákimshilik sotynyń sheshimimen órt qaýipsizdigine qatysty kemshilikterdi joımaǵany úshin ákimshilik jaýapkershilikke tartyldy.
Saýda ortalyǵyna budan buryn da birneshe márte tekseris júrgizilip, 2017 jylǵy 27 jeltoqsanda kemshilikterdi joıý jóninde nusqama berilgen eken. «Alaıda anyqtalǵan 97 kemshiliktiń 36-sy áli kúnge joıylmaǵan» deıdi sýdıa Botagóz Nurmaǵambetova.
Saýda ortalyǵy – kópshilik jınalatyn oryn. Mundaı nysanda tótenshe jaǵdaı, órt paıda bolǵan jaǵdaıda joıylmaǵan kemshilikter saldarynan kóp adam zardap shegýi múmkin. Ásirese kórshiles Reseı Federasııasynyń Kemerov oblysynda bolǵan oqıǵadan sabaq alýymyz kerek.
Is materıaldaryn zerdelegen sot keshen ıesi «PSP Serik» JShS 200 AEK kólemindegi, ıaǵnı 481 000 teńgeni quraıtyn aıyppul tartýǵa, keshen jumysyn 1 aı merzimge toqtatýǵa sheshim shyǵardy. Sot qaýlysy 10 kúnnen keıin zańdy kúshine enýi tıis.
Batys Qazaqstan oblystyq sotynyń aqparattyq qamtamasyz etý bóliminiń aqparatyna qaraǵanda, jyl basynan beri Batys Qazaqstan oblysynda úsh kásipker órt qaýipsizdigi talaptaryn saqtamaǵany úshin jaýapkershilikke tartylǵan. Kásipkerlik nysandaryna jalpy somasy 649 350 teńgeni quraıtyn aıyppul salynǵan.
Qazbek QUTTYMURATULY
«Egemen Qazaqstan»
Oral qalasy