Petropavl qurylys-ekonomıkalyq kolledjinde «Jańa gýmanıtarlyq bilim. Qazaq tilindegi 100 jańa oqýlyq» jobasy sheńberinde dóńgelek ústel ótti.
Jıyndy kirispe sózben ashqan uıymdastyrýshy ustaz Aıjan Janbylova Elbasy «Bolashaqqa baǵdar: rýhanı jańǵyrý» baǵdarlamasynda qoǵamdyq sana jańǵyrýdyń negizgi qaǵıdalaryn qalyptastyrýdy ǵana emes, sonymen birge zaman synaǵyna laıyqty tótep berýdiń naqty jobalaryn júzege asyrý talabyn qoıǵanyn aıta kelip, bul oraıda taıaý jyldarda atqarylatyn irgeli mindetter ishinde «Jańa gýmanıtarlyq bilim. Qazaq tilindegi 100 jańa oqýlyq» jobasy zor mańyzǵa ıe ekenin atap ótti. Kolledjde oqıtyn bir myńnan astam stýdent 14 mamandyqqa daıarlanady. Bilim jáne tárbıe máselelerimen 112 oqytýshy aınalysady. Memleket basshysy usynǵan joba boıynsha bárimizdiń alǵy maqsatymyz álemdik básekege qabilettilik óristegen jahandaný jaǵdaıynda halyqaralyq talaptarǵa saı sapaly bilim berýmen qatar, ulttyq-rýhanı tamyrdan qol úzbeýdiń ozyq úlgilerin qalyptastyrý, tájirıbelerin úırený bolmaq, dedi ol óz sózinde.
Kitaphana meńgerýshisi Valentına Býkatına qazaq tilindegi 100 jańa oqýlyq jobasynyń tanystyrylymy barysynda Elbasynyń sóılegen sózine arnaıy toqtaldy. Qazaq tili – baı til. Ony damytýdyń, baıytýdyń joldary san alýan. Joba aıasynda atqarylyp jatqan jumys nátıjeleri qýantarlyq. Qazaq tiliniń keńinen qoldanylýyna Úkimet tarapynan barlyq jaǵdaı týǵyzylǵan. 18 kitap pen oqý ádistemeleriniń jaryq kórýi – úlken istiń basy. Ǵylymı bilimniń keń aýqymy, onyń ishinde áleýmettaný, fılosofııa, dintaný, ekonomıka, taǵy basqa salalar qamtylǵan.
«Rýhanı jańǵyrý» baǵdarlamasynyń basty jobasyn talqylaýǵa qatysqan muǵalimder Baıan Karmanova, Oksana Kopytova, stýdent Elvıra Velgavdınova jergilikti tájirıbelermen bólisti. Kolledj elimizdegi bazalyq oqý orny sanalady. 2011 jyldan beri qazaq-norveg jobasyna qatysyp keledi. «Nátıjeli jumys jáne jappaı kásipkerlikti damytý» baǵdarlamasy boıynsha aspaz, tamaq isi, býhgalter, slesar-santehnık, elektrmen dánekerleýshi mamandary ázirlenedi. Munda 50 oqý kabıneti, 10 kompıýter synyby, 270 oryndy jataqhana, 3 arnaıy zerthana, 11 oqý-óndiristik sheberhana jumys isteıdi. Roman Shıshkın, Erýbaı Erkebulan, Janbolat Ińkár, taǵy basqa stýdentter halyqaralyq, respýblıkalyq baıqaýlardyń jeńimpazy atanǵan. Sóıleýshiler «Serpin-2050» baǵdarlamasy sheńberinde ońtústik óńirlerden kelgen jastardyń oqıtynyn, bilimdi memlekettik tilde alatyndaryn jetkizdi. «Qurylys jáne úıler men qurylystardy qoldanysqa berý», «Tehnologııa jáne tamaqtandyrý kásiporyndarynda óndiristi uıymdastyrý» bólimderinde de oqý qazaq tilinde júrgiziledi.
Aldaǵy ýaqytta da gýmanıtarlyq bilimniń barlyq baǵyttary boıynsha eń jaqsy oqýlyqtar qazaq tilinde jaryq kóretinine senimdimiz. Munyń ózi jas býynnyń álemniń eń tańdaýly týyndylarmen keńinen tanysýyna múmkindik beredi. Jahandyq básekege neǵurlym beıimdelgen mamandar daıarlaýǵa da yqpal etedi. Buǵan deıin qundy eńbekterdi orys tili arqyly bilip kelsek, endi tikeleı tanysýǵa aıqara jol ashylyp otyr. 100 oqýlyqtyń qazaq tilinde shyǵýy bilim deńgeıin jańa sapalyq deńgeıge kóteretini kúmánsiz, desti dóńgelek ústelge qatysýshylar.
О́mir ESQALI,
«Egemen Qazaqstan»
Soltústik Qazaqstan oblysy