Sońǵy eki jylda О́skemendegi oblystyq Ana men bala ortalyǵynyń eki gınekolog dárigeri Koreıa men Fransııa elderine baryp, biliktilikterin shyńdap qaıtypty.
Ortalyqtyń neonatolog dárigeri Londondaǵy álemdegi bes ozyq balalar klınıkasynyń birinde tájirıbe jınaqtady. Bıyl mundaǵy dárigerler qatary asa zárý 10 mamanmen – akýsher-gınekologtarmen, pedıatr-neonatologtarmen tolyqpaq. Sonymen qatar ortalyqqa shetelden zamanaýı medısınalyq qural-jabdyqtar satyp alynýda. Jaqynda neırohırýrgterge qajetti neıronavıgatorlar men sal aýrýyna shaldyqqan balalarǵa arnalǵan robottyq jattyǵý quraldary satyp alynbaq. Ana men bala ortalyǵynyń dırektory Ermek Omarbekovtiń aıtýynsha, ortalyq mamandarynyń shet memleketterde bilimin jetildirýine, sońǵy úlgidegi jabdyqtarmen qamtylýyna óńirdegi iri kásiporyn – «Qazsınk» kompanııasy kómek qolyn sozyp otyr. «Kásiporynnyń qarjylaı qoldaýy nátıjesinde ortalyq analar men sábılerdiń densaýlyǵyn saqtap, jaqsartýǵa septigin tıgizgen zamanaýı qural-jabdyq, tehnıkalarmen jabdyqtaldy. 2018 jyly oqý ornyn bitirip, «Ana men bala ortalyǵyna jumysqa turǵan jas dárigerlerdiń báriniń kóterme aqshasyn tóleýge de kompanııa qarajat bólýdi josparlap otyr», deıdi ortalyq dırektory.
Ana men bala densaýlyǵyna beıjaı qaramaı, qoldan kelgen kómegin kórsetip jatqan «Qazsınk» JShS-niń ákimshilik máseleler jónindegi atqarýshy dırektory Andreı Lazarev kásiporyn qarjysyna satyp alynǵan qural-jabdyqtar ortalyqtyń bólimshelerinde jumys istep turǵanyn aıtady. «Memleket-jekemenshik áriptestigi negizinde kompanııa qoldaýyna súıene otyryp, ortalyq dárigerleri dıagnostıkalyq taldaýlar jasaýdyń, otanyń jańa túrlerin meńgerip jatyr. Búginde ortalyqta laparoskopııalyq hırýrgııa tásilderi qoldanylýda. Ana men bala densaýlyǵyn jaqsartý úshin qandaı qamqorlyq jasalsa da artyqtyq etpeıdi. Bul bizdiń áleýmettik jumysymyzdyń basym baǵyttarynyń biri», deıdi ol.
Azamat QASYM,
«Egemen Qazaqstan»
О́SKEMEN