Búgin Taraz qalalyq ákimdiginiń májilis zalynda Jambyl oblysynyń ákimi Asqar Myrzahmetovtiń qatysýymen aktıv jıyny ótti. Oblys basshysy qala aktıvine Taraz qalasynyń ákimi bolyp Ǵalymjan Ábdiraıymovtyń taǵaıyndalǵanyn jetkizip, kóne shahardyń jańa basshysyn tanystyrdy. Sondaı-aq, kún sanap sáýleti artyp kele jatqan Taraz qalasynyń jańa ákimine Asqar Isabekuly birqatar mindetter júktedi.
Ǵalymjan Raıyluly Ábdiraıymov 1965 jyly týylǵan, ulty qazaq, bilimi joǵary, 1988 jyly Jambyl gıdromelıoratıvtik-qurylys ınstıtýtyn «ınjener-qurylysshy», 2003 jyly «Turan» ýnıversıtetin «zańger» mamandyqtary boıynsha bitirgen. Eńbek jolyn 1987 jyly Jambyl oblysyndaǵy «Shyǵys» kolhozynda qurylys ýchaskesiniń masteri bolyp bastaǵan. 1991-1998 jyldary Lýgovoı aýdandyq atqarý komıteti janyndaǵy sáýlet-josparlaý bıýrosynyń tehnık-qurylysshysy, «Alraı» sharýa qojalyǵynyń tóraǵasy, «Altaır» JShS sáýlet-qurylys fırmasynyń atqarýshy dırektory, 1998-2002 jyldary Almaty qalalyq ortalyq lısenzııalaý, sáýlet-qala qurylysy qyzmetiniń sarapshysy, bas mamany, bólim bastyǵy, dırektory, 2002-2003 jyldary Almaty oblysy boıynsha sáýlet-qurylys baqylaý jáne lısenzııalaý aýmaqtyq basqarmasynyń bastyǵy, Astana qalasy boıynsha ındýstrııa, saýda jáne shaǵyn bıznesti qoldaý departamenti dırektorynyń orynbasary, 2003-2009 jyldary Almaty oblysynyń memlekettik sáýlet-qurylys baqylaý basqarmasynyń bastyǵy, 2009-2013 jyldary Qazaqstan Respýblıkasy Qurylys jáne turǵyn úı-kommýnaldyq sharýashylyq isteri agenttiginde basqarma basshysy, departament dırektory – Qazaqstan Respýblıkasynyń memlekettik qurylys ınspektory, 2013-2014 jyldary Qazaqstan Respýblıkasy О́ńirlik damý mınıstrligi Qurylys jáne turǵyn úı-kommýnaldyq sharýashylyq isteri komıteti tóraǵasynyń orynbasary, 2014-2015 jyldary Almaty oblysy ákimi apparatynyń basshysy, 2015-2017 jyldary Almaty oblysy ákiminiń orynbasary, 2017 jyldyń 15 aqpanynan búgingi kúnge deıin Jambyl oblysy ákiminiń orynbasary qyzmetterin atqarǵan.
Hamıt Esaman,
«Egemen Qazaqstan»
Jambyl oblysy