Aqtaý qalasyndaǵy Nazarbaev Zııatkerlik mektebinde 7-11 synyp oqýshylary men kolledj stýdentterine arnalǵan «Caspian Start-Up 2018» baıqaýy ótti. Atalǵan baıqaý aıasynda iriktelgen 20 startap jobanyń ishindegi eń úzdikteri anyqtalyp, demeýshiler jáne kásipkerler taǵaıyndaǵan jalpy kólemi 1 mıllıon 540 myń teńge qarjylaı syılyq tabystaldy.
Startaptar baıqaýynyń fınalyna Mańǵystaý oblysynyń aýdandarynan, Atyraý oblysynan, Astana qalasynan oqýshylar men stýdentter qatysty. Olar kásipkerler men startap saıystardyń jeńimpazdarynan quralǵan táýelsiz qazylar alqasynyń aldynda bastaǵysy keletin startap týraly bes mınýt kóleminde aıtyp berip, bıznes-josparyn túsindirdi.
Jarys nátıjesinde Mańǵystaýdaǵy Túıesý jerinen safarı jasaýdy usynǵan Aqtaýdaǵy Nazarbaev Zııatkerlik mektebiniń 11-synyp oqýshysy Dana Aqýal bas júldege laıyq dep tanylyp, 300 myń teńge kóleminde qarjylaı syılyqqa ıe boldy. Al, ekinshi oryn erikti qan tapsyrýshylar bazasyn jasaqtaýdy usynǵan Astanadaǵy fızıka-matematıka baǵytyndaǵy Nazarbaev Zııatkerlik mektebiniń 11-synyp oqýshysy Qýanysh Amanǵalıǵa buıyrdy. Oǵan «Forte bank» AQ Mańǵystaý oblystyq fılıaly men «MKS Logistics» JShS atynan 250 myń teńge berildi. Úshinshi orynǵa tigilgen 200 myń teńge Beıneý lıseıinen kelgen Laýahaev Nur, Aıagýzov Ǵalymjan jáne Bekzat Salıevke berildi. Mektep oqýshylary asyq oınynan áıgili monopolııa oıynyn jasaýdy usynǵan bolatyn.
– Startaptar baıqaýyna jobalaryn alyp kelgen jastardyń bıznes bastaýǵa degen qushtarlyǵy qýantady. Búgingi kelgen jobalardyń ishinde júzege asyrýǵa bolatyndary bar. Aldaǵy ýaqytta budan da myqty startaptardy kútemiz, – dedi qazylar alqasynyń múshesi, kásipker, «Mediana Service Limited» IT-kompanııasynyń tehnıkalyq dırektory О́mirbek Qurbanbaev.
Mańǵystaý obylsyndaǵy jastardyń startap jobalardy qolǵa alyp, olardy júzege asyrýyn yntalandyrýda oblys kásipkerleri belsendilik tanytty. Jarys qorytyndysynda baıqaýdyń bas demeýshileri «Forte bank» AQ Mańǵystaý oblystyq fılıaly men «MKS Logistics» JShS 8 qatysýshyǵa 30 myń teńgeden syıaqy berse, «Evrovoıaj -Aqtaý» avıatýragenttigi jáne «Sáýlet Kompanı LTD» qurylys kompanııasynan 500 myń teńge kólemindegi qarjylyq syıaqy 4 jobaǵa berildi.Sonymen qatar, «Atameken» «Atameken» kásipkerler palatasynyń Mańǵystaý oblystyq fılıalynyń kómegimen jáne oblystaǵy kásipkerlerdiń sheshimimen «Caspian Start-Up 2018» startaptar baıqaýynyń fınalyndaǵy 4 joba qarjylandyrylatyn bolyp sheshildi.
Oqýshylar men stýdentter arasynda jańa jobalardy tanystyrý alańyn qurý, ınnovasııalyq birlestiktiń áleýetin kórsetip, ony qoldaý maqsatynda oqýshylar men kolledj stýdentterine arnalyp ótkizilgen tuńǵysh startaptar baıqaýyn Aqtaý qalasyndaǵy hımııa-bıologııa baǵytyndaǵy Nazarbaev Zııatkerlik mektebi men Mańǵystaý oblystyq bilim basqarmasy uıymdastyrdy.
Gúlaıym ShYNTEMIRQYZY,
«Egemen Qazaqstan».
Mańǵystaý oblysy