«Astana» Prezıdenttik klýbynyń quramyna enetin «Astana» velokomandasynyń bas menedjeri Aleksandr Vınokýrov 4-mamyr kúni bastalatyn «Djıro d'Italııa» jarysyna komanda qandaı daıyndyqpen kelgeni jaıly áńgimeledi.
- Birneshe kún buryn «Djıro d'Italııa» velododasynyń aldyndaǵy negizgi daıyndyq bolyp sanalatyn «Alpi týry» aıaqtaldy. Bizdiń basty qarsylastarymyzdyń barlyǵy sol jarysta boldy. Bes kezeńniń úsheýinde jeńiske jetken komanda óz-ózin tamasha kórsetti. Pelo Bılbao men Lýıs Leon Sancheske ózderin kórsetýge múmkindik berdik. Ol komanda ishindegi klımatty nyǵaıtyp jáne shabandozdardy jigerlendirý úshin asa mańyzdy qadam edi. Bizdiń kóshbasshymyz Mıgel Anhel Lopes koroldik kezeńde jeńiske jetti. Jıi shabýyldap, qorytyndy klassıfıkasııa nátıjesi boıynsha 3-oryndy ıemdendi. Jalpy, komanda bul jarysty óte belsendi ótkizdi. Nátıjesinde basty esepte 10 myqtynyń qataryna birden «Astananyń» 3 shabandozy - Lopes, Lýıs Leon Sanches jáne Iаn Hırt endi. Qazaqstandyq shabandoz Andreı Zeıs úzdikter qatarynan alys bolmady. Ol 11-oryndy ıemdendi. Sáıkesinshe, qorytyndy esep boıynsha «Astana» «Úzdik komanda» atandy. Bul komandanyń jaqsy dárejedegi daıyndyǵynyń kórsetkishi. Oqý-jattyǵý jıyndaryn jaqsy ótkizip, durys baǵytta kelemiz. Biraq, jigitter óz qalyptarynyń shyrqaý shyńyna áli jete qoımady. Olar «Djıro» barysynda áleýetterin odan ári jaqsartady. Sondyqtan tartys óte qyzyqty bolmaq. «Astana» óz jankúıerlerin tosynsyımen qýantady degen senimdemin. Oǵan qosa ol quramǵa qazir ekstrımaldy taýly aımaqta belsendi daıyndyq jumystaryn júrgizip jatqan bizdiń Alekseı Lýsenko da enedi.
Sonymen qatar, Olımpıada chempıony sprınter Rıkkardo Mınalıden basqa tolyqtaı qazaqstandyq jigitter qatysqan «Horvatııa Týryndaǵy» komandanyń nátıjesi jaıly aıtyp berdi.
- «Horvatııa Týrynda» komanda óz-ózin tamasha kórsetti. Jigitter tek aldyńǵy shepte bolyp, laıyqty jumys atqardy. Bizdiń qazaqstandyq jas shabandoz Evgenıı Gıdıch «Horvatııa Týrynyń» koroldik taýly kezeńin qalaı júrip ótkenin barlyǵy kórgen shyǵar. Ol tájirıbeli, ári myqty kásibı taý velesebedshilermen birge fınıshke úzdik úshtik qatarynda keldi. Onyń básekelesteri 35-37 jastaǵy shabandozdar. Olar Álemdik Týr sanatyna jatatyn komandalar sapynda orasan zor tájirıbe jınaǵandar. Sonymen qatar, taý joly qıyn ári tik bolyp keldi. Shynymdy aıtsam, Jenıa bizdi qatty tańqaldyrdy. Ol kúsh-qýaty zor talantty shabandoz. О́te jyldam damyp kele jatqanyn baıqadyq. Sondaı-aq, márede jaqsy áreket etip, sprınter retinde de jumys jasaı alady. «Horvatııa Týrynyń» bas klassıfıkasııasynyń nátıjesi boıynsha úzdik úshtik qatarynda bolǵan Evgenıı «Úzdik jas shabandoz» retinde aq jeıde ıegeri atandy. Bul jarys aldynda Baqtııar Qojataevtyń syrqattanyp, nashar qalypta bolǵany ókinishti. Baqtııar bas klassıfıkasııada joǵarǵy oryndarǵa talasa alar edi. Aıtpaqshy, jarysqa alǵashqy ret sporttyq dırektor retinde bizdiń qazaqstandyq, Asan Bazaev qatysty. Ol úshin de jarys jaqsy aıaqtaldy.