Qazaqstannyń BUU janyndaǵy Turaqty ókildiginde ıslam áleminiń tarıhynda alǵash ret 2017 jyly qyrkúıekte Astanada ótken IYU-nyń Ǵylym jáne tehnologııalar jónindegi sammıtiniń qorytyndylaryna arnalǵan Islam yntymaqtastyǵy uıymyna múshe elder elshileriniń kezdesýi ótti.
Nıý-Iorkte ótken bul jıyn barysynda elimizdiń BUU janyndaǵy Turaqty ókili Qaırat Omarov uıymǵa múshe elder Qazaqstan Prezıdenti Nursultan Nazarbaevtyń osy sammıtti ótkizý týraly bastamasyn qoldaı otyryp, ıslammen nıettes ekenin kórsetkenin atap ótti. Sondaı-aq ol atalǵan sammıttiń EKSPO-2017 halyqaralyq kórmesin ótkizý merzimine oraılastyrylǵanyn eske saldy. Onda musylman elderiniń ókilderi energetıka salasyndaǵy eń jańa ǵylymı-tehnıkalyq jetistiktermen tanysýǵa múmkindik aldy.
Q.Omarovtyń aıtýynsha, Qazaqstan álemdik ekonomıkadaǵy ıslam áleminiń básekege qabilettiligin bizdiń tabystarymyz jáne bolashaǵy zor jetistikterimiz anyqtaıtynyna senimdi. Buǵan qosa, ol musylman elderin ıslamnyń asyl qundylyqtaryn nasıhattaý jáne búkil álemde ınnovasııalyq ıdeıalardy engizý úshin jaýapkershilikti ózine alatyn ıntellektýaldy elıtanyń jańa urpaǵyn tárbıeleýge shaqyrdy. Sonymen qatar sammıttiń tabysy atap ótildi.
Qorytyndylaı kele, Q.Omarov ǵylym men tehnologııalar damýdyń qazirgi zamanǵy problemalaryn, sonyń ishinde kedeılikpen kúres, densaýlyqty, qorshaǵan ortany qorǵaý, azyq-túlikpen, sýmen qamtamasyz etý jáne energetıkalyq qaýipsizdik máselelerin sheshýde negizgi ról atqaratynyn eske saldy.
Sóz sóılegen IYU-ǵa qatysýshy elderdiń turaqty ókilderi osy taqyryptyń barlyq musylman qaýymy úshin ózekti ekenin atap ótti. Aýǵanstan elshisi Mahmýd Saıkal Qazaqstannyń Turaqty ókildigine maqsaty jalpy damý úshin oń negizde aqyl-oıdy biriktirý bolyp tabylatyn osy mańyzdy jáne ýaqtyly dıalogty uıymdastyrǵany úshin alǵysyn bildirdi. О́zbekstan elshisi Bahtıor Ibragımov Qazaqstannyń ǵylym jáne tehnologııalar jónindegi birinshi sammıtti shaqyrýda kórsetken kóshbasshylyǵyn ataı otyryp, qatysýshylarǵa 2020 jyly ekinshi sammıtti ótkizetin Tashkent osy estafetany Astanadan alǵany týraly habarlady.
Gaıananyń elshisi Rýdolf Ten-Poý birinshi sammıttiń sheshimderin is júzinde júzege asyrý ıslam álemindegi ǵylym men tehnologııalardy damytý úshin óte mańyzdy ekenin jetkizdi. Onyń aıtýynsha, elderdiń ártúrli salalardaǵy artyqshylyqtarynyń sınergııasy shynaıy progreske qol jetkizýge múmkindik beredi.
Mysyrdyń ókili IYU-nyń is-qımyl baǵdarlamasy men BUU-nyń 2030 jylǵa deıingi damý kún tártibin progress pen nıettestilikke baǵyttalǵanyn ataı otyryp, olardy salystyrdy.
Is-sharaǵa qatysqan Irak, Qatar, Lıvan, Palestına, Qyrǵyzstan, Týnıs memleketteriniń elshileri, sondaı-aq Birikken Arab Ámirlikteriniń, Ýganda, Djıbýtı, Iordanııa, Túrkııa, Túrikmenstan jáne IYU-nyń ózge de elderiniń ókilderi Qazaqstannyń sammıtti shaqyrý týraly bastamasyn joǵary baǵalap, ǵylymı jáne tehnologııalyq damý taqyryby jahandyq aqparattyq progrestiń qazirgi jaǵdaıynda óte mańyzdy ekenin atap ótti.
Daıyndaǵan
Joldybaı BAZAR, «Egemen Qazaqstan»