Fýtboldan Mysyr quramasynyń jáne «Lıverpýl» klýbynyń jartylaı qorǵaýshysy Mohamed Salah fýtboldan Anglııa premer-lıgasynyń osy maýsymdaǵy eń úzdik fýtbolshysy dep tanyldy.
«Lıverpýl» fýtbol klýbynyń quramyna 2017 jyly qosylǵan Mohamed Salah komanda sapynda 33 match ótkizip, 31 márte gol salsa, 9 ret áriptesterine nátıjeli pas asyrǵan. «Bul men úshin úlken maqtanysh. Men bul maýsymda óte kóp eńbek ettim. Osyndaı marapat alǵanyma qýanyshtymyn», deıdi Salah.
Mohamed Salahtan bólek bul ataqqa Kevın De Brıýıne, Davıd de Hea (ekeýi de «Manchester Iýnaıted»), Harrı Keın («Tottenhem»), Leroı Sane jáne Davıd Sılva (ekeýi de «Manchester Sıtı») syndy fýtbolshylar úmitker atanǵan edi.
«Ak Bars» Gagarın kýbogyn ıelendi
Qurlyqtyq hokkeı lıgasynyń 2017/2018 maýsymynyń fınalyna Máskeýdiń SSKA klýby men Qazannyń «Ak Bars» hokkeı komandalary shyqqan bolatyn.
Gagarın kýbogyn ıelený úshin komandalarǵa 4 jeńis qajet edi. Nátıjesinde «Ak Bars» 4:1 esebimen basym túsip, Gagarın kýbogynyń jeńimpazy atandy. Sondaı-aq Gagarın kýbogyn óz qanjyǵalaryna úshinshi ret baılap otyr. Mundaı tabysqa ázirshe basqa komandalar qol jetkize qoıǵan joq. Alǵashqy eki oıynda «Ak Bars» jeńiske jetse, úshinshi oıynda SSKA býllıtten basym tústi. Al keıingi eki matchta da Qazannyń komandasy ózderiniń jeńiske laıyq ekenderin kórsetti.
Bıylǵy maýsymnyń qorytyndysy boıynsha «Shyǵys» konferensııasy jeńiske jetti. Fınalǵa deıin jetken «Ak Bars» QHL-diń pleı-off kezeńinde «Amýr», «Metallýrg» jáne «Traktor» komandalarymen kúsh synasyp, basym túsken bolatyn. Aıta keteıik, «Ak Bars» 2009 jyly Gagarın kýbogynyń tuńǵysh jeńimpazy atanǵan-dy. 2010 jyly ekinshi ret Qurlyqtyq hokkeı lıgasynyń bas júldesin ıelengen.
Úndistan jazǵy Olımpıada ótkizýge nıetti
Úndistannyń Olımpıada assosıasııasynyń basshysy Narınder Batranyń aıtýynsha, memleket 2032 jylǵy jazǵy Olımpııa oıyndaryn ótkizý úshin Halyqaralyq Olımpıada komıtetine óz ótinishterin bermek, dep jazady Inside The Games basylymy.
«Biz 2026 jyly jasóspirimder arasyndaǵy Olımpııa oıyndaryn, 2030 jyly Azııa oıyndaryn jáne 2032 jyly Olımpıadany óz elimizde ótkizý úshin jaqyn arada usynyspen shyǵamyz. Biz jeńip shyǵatynymyzdy nemese jeńbeıtinimizdi bilmeımin, biraq osyndaı iri dodalardy ótkizýge árqashan daıyn ekenimizdi aıtqymyz keledi», deıdi Batra.
Úndistannyń Olımpııa oıyndaryn ótkizýge nıetti ekenin estigen HOK prezıdenti Tomas Bah tańdanysyn bildirgen.
Daıyndaǵan
Álı BITО́RE, «Egemen Qazaqstan»