Budan bylaı Maqtaral aýdanynyń bazarlarynda sanıtarlyq kún belgilenip, órt qaýipsizdigi qatań qadaǵalanatyn bolady. Sondaı-aq, saýda ortalyqtarynyń 30 paıyzǵa jýyǵy avtoturaqqa aınalyp, baǵanyń turaqtylyǵy da qamtamasyz etiledi. Bul týraly bazar basshylarymen arnaıy jıyn ótkizgen aýdan ákimi Jamantaı Beısenbaev málim etti.
Jıyn barysynda aýdandyq tótenshe jaǵdaılar jáne sanıtarlyq epıdemıologııalyq qadaǵalaý bólimderiniń basshylary bazarlardaǵy búgingi hal-aqýaldy baıandap berdi. Olardyń aıtýynsha, aýdandaǵy birqatar bazarlarda órtke qarsy sharalarǵa daıyndyq jumystary júrgizilmeı otyr. Máselen, aýdandyq tótenshe jaǵdaılar bóliminiń basshysy Bahadyr Beknazarov órt kezinde sý jetkizetin gıdranttardyń "Kúlparshyn" bazarynda ǵana ornatylǵandyǵyn, sondaı-aq bul qurylǵy "Sapar" bazarynda endi ǵana ornatylyp jatqandyǵyn aıtty.
Bólim basshysy kóptegen bazarlarda saýda qatarlarynyń ara qashyqtyǵy jaqyn ornalasqandyqtan, órt sóndirý kólikteri tilsiz jaý shyqqan jerge jete almaıtyndyǵyn alǵa tartty. Osy rette, sóz alǵan aýdan basshysy bazar basshylaryn órt qaýipsizdiginiń talaptaryn saqtaýǵa jáne jabaıy saýda núktelerin jabýdy, sondaı-aq, avtoturaq máselesin erterek sheshýge shaqyrdy. Sonymen qatar, memleket tarapynan beriletin túrli jeńildikterdi tıimdi paıdalaný úshin barlyq qujattardyń zańdy rásimdelýin tez arada retteý qajettigin eskertti.
"Búginde aýdanymyzda 12 bazar halyqqa qyzmet etedi. Alaıda, bazarlardyń órtten qorǵalýy, sanıtarlyq jaǵdaıy, saýda núkteleriniń retsiz ornatylýy, avtoturaqtardyń azdyǵy, jabaıy saýda sııaqty máseleler joq emes. Al, gıdranttar men sý haýyzdaryn ornatý boıynsha usynys berilgen, degenmen nátıje bolmaı otyr. Eń bastysy, bazarǵa kelýshiler men saýdagerlerdiń kásipterine eshqandaı qaýip tónbeýi kerek. Taýar saqtaý qoımalary órt shyǵa qalǵan jaǵdaıda jaýapkershilikten qashpaýy tıis" - dep eskertti aýdan basshysy J.Qanaıuly.
Munan soń sóz alǵan aýdandyq sáýlet, qala qurylysy jáne qurylys bóliminiń basshysy Sansyzbaı Seıdalıev bazarlardyń bas jospary qaıta jasalýy kerektigin atap ótti. "Saýda qatarlary men núkteleriniń ornalasýy, onyń kiris-shyǵys qaqpasy, avtoturaq t.b. obektileri bas jospar boıynsha bekitilip, jasalynýy tıis" - dedi bólim basshysy.
Jıyndy qorytqan aýdan ákimi aldaǵy ýaqytta bazarlarda aptanyń 1 kúnin "sanıtarlyq kún" dep belgileýdi usynyp, tıisti mekemelerge zańdylyǵyn anyqtaýdy tapsyrdy.