Rýdnyı qalalyq ishki ister basqarmasynyń qyzmetkerleri Qashar kentindegi bir dúkennen tonalǵan iri kólemdegi altyn buıymdarynyń urlyǵyn ashty. Sáýir aıynyń 7-8 kúnderi urylar dúkendegi altyn buıymdar saqtalǵan temir seıf kiltiniń kóshirmesin jasap alyp, 26 mıllıon teńgeniń zergerlik zattaryn alyp ketken.
Jedel-izdestirý toby zergerlik zattardy qoldy etken 22 jastaǵy eki jumyssyz jigitterdiń isi ekenin anyqtaǵan. Onyń biri buryn da urlyǵy úshin sotty bolǵan. Olardyń urlyq jasaýyna jaǵdaı týǵyzǵan 38 jastaǵy satýshy áıel ekendigi de áshkere boldy. Tergeý isinde anyq bolǵanyndaı, kúdikti áıel eki jyl boıy jeke kásipkerge satýshy bolyp jumys istegen. Osy jyldar ishinde ol jumys berýshige qaryz bolyp qalady. Ony óziniń 18 jastaǵy qyzyna aıtady. Qyzy óziniń tanystaryna dúkendegi «Qaryz kitabynyń » kózin joıýdy jáne altyn buıymdardy alyp ketýdi ótinedi. Sonan keıin kúdikti jigitter seıf kiltiniń kóshirmesin jasaýǵa kirisedi.
Altyn buıymdar qolyna tiıisimen eki ury taksı shaqyryp, aldymen Qostanaıǵa, odan Astanaǵa, odan Almatyǵa ketedi. Almatyda olar altyn buıymdardy 600 myń teńgege satady da, qalǵanyn bir úıdiń aýlasyna kómip ketedi. Olar ushaqpen Qostanaıǵa qaıtyp oralady.
Rýdnyı qalalyq ishki ister basqarmasyndaǵy tájirıbeli polıseılerdiń arqasynda iri urlyq osylaı ashylady.
Rýdnyı qalalyq ishki ister basqarmasynyń bastyǵy Álim Bajyqbaev altyn buıymdardyń satylmaı qalǵandary kúdiktilerdiń páterinen, Almatydaǵy jer «seıfinen» tapqandyǵyn jáne olardyń úı qamaǵynda otyrǵanyn habarlady. Qazir QR QK «urlyq» baby boıynsha sotqa deıingi tergeý amaldary júrip jatyr.
Názıra JÁRIMBET, «Egemen Qazaqstan»
Qostanaı oblysy,
Rýdnyı qalasy