Tarbaǵataı taýynyń eń bıik shyńdarynyń biri «Aqperli shyńy» dep atalady. Qaı jyly týyp, qashan qaıtys bolǵany beımálim Aqperli degen kisiniń boıynda kóripkeldik qasıet bolǵan desedi.
Dúnıeden óterinde: «Men senderge naızaǵaı jarqyldatyp, kún kúrkiretip maza bermeımin ǵoı. Meni etekke jerlemeńder. Tarbaǵataıdyń eń bıik shyńyna aparyp qoıyńdar» dep amanat qaldyrypty urpaqtaryna. Jergilikti jurttyń aıtýynsha, «Aqperli» shyńynyń basyna bult úıirilse, mindetti túrde kún kúrkirep, jańbyr jaýady eken. Sol mańnan mal aıdap ótken adamdar duǵa qylmaı, maldary qyrylyp qalǵan jaǵdaılar da bolypty.
Jaqynda Úrjar aýdanynyń Besterek aýyly mańynda ómiri zerttep-zerdeleýdi qajet etetin osynaý jumbaq tulǵanyń qurmetine «Aqperli» dep atalatyn báıge alańy saltanatty túrde ashyldy. «Aýdanymyzda ulttyq sport túrleri keń qanat jaıyp keledi. Jyl basynda respýblıkalyq búrkitshiler saıysy da osy Besterek aýylynda ótkeni belgili. Qoldarynan uıaly telefondaryn tastamaıtyn búgingi jastar bir ýaq taza aýada serýendep, atqa minse degen nıetpen ashyp jatyrmyz bul báıge alańyn», deıdi is-sharany uıymdastyrýshylardyń biri Saıat Baıqadamov.
Qarly shyńdary menmundalap alystan kózge túsetin Tarbaǵataı taýy baýraıyndaǵy báıge alańynyń bir aınalymy - úsh shaqyrym. Bul kúni báıge alańynyń ashylý qurmetine oraı taı, qunan, at jarysy uıymdastyrylyp, jınalǵan jurtty bir serpiltip tastady.
Azamat QASYM, «Egemen Qazaqstan»
Shyǵys Qazaqstan oblysy,
Úrjar aýdany,
Besterek aýyly