«Rýhanı jańǵyrý» baǵdarlamasynyń «Qazaq tilindegi 100 jańa oqýlyq» jobasy negizinde aýdarylǵan alǵashqy 18 kitaptyń elimizdegi Joǵarǵy oqý oryndaryna qashan jetkiziletini anyqtaldy, dep habarlaıdy QazAqparat.
Kitaptardyń ýnıversıtetter men ınstıtýttarǵa jetkizilý merzimin QR Tuńǵysh Prezıdenti - Elbasy Qorynyń janyndaǵy ÁESI-diń oqýlyqtardy saraptaýǵa arnalǵan kezdesýinde Ulttyq aýdarma bıýrosynyń joba basshysy Álibek Qısybaı aıtty.
«Rýhanı jańǵyrý» baǵdarlamasynda aıtylyp ketkendeı, Qazaqstanda qazirgi zamanda ınjenerler men dárigerler ǵana emes, bolashaqty tereń túsinetin bilikti gýmanıtarlyq salanyń mamandary da asa qajet. Sana modernızasııasy gýmanıtarlyq bilimge tikeleı baılanysty. Osy oraıda tarıh pen saıasattaný, áleýmettaný men fılosofııa, psıhologııa, antropologııa, mádenıettaný, fılologııa jáne pedagogıka ǵylymdary boıynsha stýdentterge zamanǵa laıyq, bilim berý úshin jaǵdaı jasaý mindeti tur. Osy mindetti iske asyrýǵa múmkindik beretin negizgi tetik retinde - «Jańa gýmanıtarlyq bilim - qazaq tilindegi 100 jańa oqýlyq» jobasy qolǵa alyndy», - deıdi Álibek Qısybaı.
Ol óz sózinde kópke belgili bolyp otyrǵandaı, atalǵan joba boıynsha alǵashqy 18 kitap tanystyrylǵanyn, Prezıdent, Úkimet músheleri jáne akademııalyq orta bul oqýlyqtardyń sapasyn joǵary baǵalaǵanyn atap ótti.
«Aýdarylǵan kitaptardy tańdaý úshin elimizdegi barlyq oqý ornydarynan usynystar jınalyp, bizdiń qorǵa barlyǵy 800-den astam oqýlyqtyń tizimi kelip tústi. Jınaqtalǵan tizimderdiń negizinde birneshe ret basylǵan, sońǵy basylym keıingi úsh jylda shyqqan, mazmundyq turǵydan beıtarap bolýy qajet degen talaptarǵa súıene otyryp, 2017 jyly 18 oqýlyq tańdaldy. Sonymen qatar, bul oqýlyqtar dúnıe júzindegi TOP-100 ýnıversıtettiń, mysaly Garvard, Stenford, Oksford, Kolýmbııa ýnıversıtetteri sekildi oqý baǵdarlamasynda bolýy qajet boldy», - deıdi ol.
Iriktelgen oqýlyqtardy aýdarý jumysyna Qazaqstannyń aldyńǵy qatarly oqý oryndary men 200-ge tarta maman qatysty. Álibek Qısybaıdyń sózine sensek, aýdarmaǵa tek aýdarmashylar ǵana emes, osy salanyń bilikti ǵalymdary, akademıkteri men professorlary atsalysqan.
«Josparǵa saı, bul oqýlyqtar mamyr aıynyń sońyna deıin JOO-larǵa jetkiziledi. 2018-2019 oqý jylynan bastap aýdarylǵan oqýlyqtar joǵarǵy bilim berý júıesine enedi. Sondaı-aq, osy oqýlyqtarmen Qazaqstannyń barlyq JOO-laryndaǵy stýdentter oqytyla bastaıdy», - dedi Álibek Qısybaı.
Aıta ketý kerek, Elbasynyń «Rýhanı jańǵyrý» baǵdarlamasy aıasyndaǵy «Jańa gýmanıtarlyq bilim. Qazaq tilindegi 100 jańa oqýlyq» jobasy boıynsha qazaq tiline 18 kitap aýdarylǵan bolatyn.