Oblystyq tilderdi damytý basqarmasynyń uıymdastyrýymen Dostyq úıinde memlekettik tildi meńgergen etnos jastarynyń arasynda «Til – parasat» oblystyq baıqaýy ótkizildi. Baıqaýǵa 17-22 jas aralyǵyndaǵy 18 jas qatysty.
Baıqaýdyń maqsaty memlekettik tildiń qoldanylý aıasyn keńeıtý, til mádenıetin kóterý, etnos ókilderin yntalandyrý, talantty jastardy anyqtaý jáne qoldaý, qazaq tiliniń latyn álipbıine kóshirýdi qoldaý bolatyn. Baıqaý usynylǵan taqyryp boıynsha daıyndyqsyz aýyzsha tusaýkeser jasaý; qazaq tilinde esse jazý; «Shabyt juldyzy» shyǵarmashylyq tapsyrmasy. Qazaqtyń halyq nemese zamanaýı ánin oryndaý, bı, kúı ne bolmasa kórkem shyǵarma úzindisiniń qoıylymy sharttarynan turdy.
Saıysqa qatysýshylardyń barlyǵynyń da uqypty daıyndyǵy, yntasy baıqaldy. Degenmen ozǵandar anyqtalmasa darys bolmaıdy. Áýlıekól aýdanynan kelgen Halmýrad Baımetov «Sóz sheberi», Fedorov aýdanynan kelgen Aleksandra Sorokına «Shabyt juldyzy», Meńdiqara aýdanynan kelgen Vera Ponkratenko «Kórermen kózaıymy» nomınasııalaryna ıe bolyp, dıplomdarmen jáne «Sýlpak» turmystyq-tehnıkalardy satý boıynsha dúkender jelisiniń 5 myń kólemindegi syılyq sertıfıkattarymen marapattaldy.
Baıqaý qorytyndysy boıynsha júldeli I oryndy Amangeldi aýdanynan kelgen Terenteva Oksana ıe bolyp, dıplommen jáne «Sýlpak» turmystyq-tehnıkalar dúkender jelisiniń 20 000 teńge kólemindegi sertıfıkatymen marapattalady. Júldeli II oryndy Qostanaı pedagogıkalyq kolledjiniń stýdenti Sýltanshına Vıktorııa ıe bolyp, ol da dıplommen jáne «Sýlpaktyń» 15 000 teńge kólemindegi sertıfıkatymen marapattalady jáne III orynǵa rýdnyılyq Doroshko Vıktorııa ıe bolyp, dıplommen jáne «Sýlpak» dúkeniniń 10 000 teńge kólemindegi sertıfıkatymen marapattalady.
Názıra JÁRIMBET, «Egemen Qazaqstan»