Búgin Elbasy tapsyrmasymen Premer-Mınıstri Baqytjan Saǵyntaev Prezıdenttiń «Qazaqstannyń úshinshi jańǵyrýy: jahandyq básekege qabilettilik», «Tórtinshi ónerkásiptik revolıýsııa jaǵdaıyndaǵy damýdyń jańa múmkindikteri» Joldaýlary men «Bes áleýmettik bastamasynyń», sondaı-aq memlekettik jáne salalyq baǵdarlamalardyń júzege asyrylý barysymen tanysý úshin Qaraǵandy oblysyna keldi.
Jumys sapary barysynda Sátpaev, Jezqazǵan, Qaraǵandy qalalarynyń birqatar ónerkásiptik jáne áleýmettik nysandaryn aralaý josparlanǵan, atap aıtqanda: Elbasynyń tapsyrmasy boıynsha salynyp jatqan «Nurly meken» shaǵyn aýdany, «Haným» makaron sehy, mamandandyrylǵan azyq-túlik ónimderin shyǵaratyn «Bayan» JShS. Premer-Mınıstr medısınalyq ortalyq negizinde oblystyń densaýlyq saqtaý júıesin sıfrlandyrý barysymen, qaıta retteý, MJÁ jáne jekelegen qyzmetter sektoryn damytý jaǵdaıymen tanysady.
B. Saǵyntaev «Saryarqa» AEA aýmaǵynda sharly krandar men ilmekti armatýra shyǵaratyn «Bıomer armatýra» JShS zaýytyn tekserip, paıdalanýdan shyqqan kólik quraldarynyń metall synyqtarynan shoıyn, bolat, alıýmınıı, tústi metall qorytpalaryn shyǵaratyn «Recycling Company» JShS kásipornyna barady.
Jezqazǵanda Baqytjan Saǵyntaev áleýmettik-ekonomıkalyq damý máseleleri boıynsha óńirdiń aktıvimen jáne jurtshylyǵymen kezdesý ótkizedi.
Monoqalalardy damytýdyń qazirgi qarqyny men perspektıvalary, tehnologııalyq jańǵyrtý, ınvestısııalar tartý, sondaı-aq Memleket basshysynyń «Rýhanı jańǵyrý» baǵdarlamasyn iske asyrý nátıjeleri jáne «Bes áleýmettik bastamany» oryndaý tetikteri, sonyń ishinde óńirdi gazdandyrý jáne Qyzylorda — Jezqazǵan — Qaraǵandy — Astana baǵyty boıynsha «Saryarqa» gaz qubyryn salý máseleleri qaralady.
Qaraǵandy polıtehnıkalyq kolledjin aralaý qorytyndysy boıynsha oblystyń stýdent jastarymen «Prezıdenttiń bes áleýmettik bastamasyn» júzege asyrý, onyń ishinde bilim alýdyń qoljetimdiligin arttyrý, stýdentterdiń turmys jaǵdaıyn jaqsartý jáne jańa turǵyn úı baǵdarlamasy máseleleri jóninde kezdesý ótkiziledi.
Oblys aktıvimen, iri jáne shaǵyn bıznes ókilderimen kezdesý Memleket basshysynyń «Tórtinshi ónerkásiptik revolıýsııa jaǵdaıyndaǵy damýdyń jańa múmkindikteri» Joldaýyn iske asyrý máselelerine arnalady.
Eske sala keteıik, bul bıyldyqqa el óńirlerine tórtinshi jumys sapary. Buǵan deıin Baqytjan Saǵyntaev jumys saparymen Ońtústik Qazaqstan, Qyzylorda jáne Atyraý oblystarynda bolyp qaıtty.
Anyqtama: Qaraǵandy oblysy — Qazaqstannyń negizgi ónerkásiptik aımaqtarynyń biri. JО́О́ qurylymynda ónerkásip úlesi — 49,5%, aýyl sharýashylyǵy — 3,2%, qurylys — 2,8%, saýda — 12%, kólik jáne qoımalaý — 6,9%, aqparat jáne baılanys — 0,6%, jyljymaıtyn múlik operasııalary — 5,6%, basqalary — 19,4% quraıdy.
Oblystyń júıe qurýshy kásiporyndary: «ArselorMıttal Temirtaý» AQ, «Qazaqmys Korporasııasy» JShS, «Evrazıan Fýds» AQ, «Qazortalyqelektrsym» JShS, «Central Asia Cement» AQ, «Jáırem taý-ken baıytý kombınaty» AQ.