Memleket basshysynyń tapsyrmasy boıynsha Qaraǵandy oblysyna jumys sapary aıasynda QR Premer-Mınıstri Baqytjan Saǵyntaev Jezqazǵandaǵy «Qazaqmys korporasııasy» JShS medısınalyq ortalyǵynda boldy. Bul týraly primeminister.kz habarlaıdy.
Nysandy tekserý kezinde medısınalyq ortalyqtyń dırektory V. Motorykın Premer-Mınıstrge mekeme jumysy týraly aıtyp, júrekke kúrdeli operasııalardy júrgizýge múmkindik beretin Innova IGS 530 jańa angıografııalyq qondyrǵyny kórsetti. B. Saǵyntaev Býbnovskıı ortalyǵyna barǵan kezde osynda engizilgen kınezıterapııa ádisterimen jáne ońaltýǵa arnalǵan jańa quraldarmen tanysty.
Búgingi tańda «Qazaqmys» korporasııasynyń medısınalyq ortalyǵynda 1200-den astam adam, onyń ishinde 124 dáriger (joǵary sanattaǵy 45 dáriger), 800-den astam medbıke jumys isteıdi. Ortalyq densaýlyq saqtaý oryndaryna qyzmet kórsetý, kásibı dárigerlik tekserý, shuǵyl, ambýlatorlyq-emhanalyq, stasıonarlyq medısınalyq kómek kórsetý, dárihana qyzmetterimen aınalysady.
Tósek oryndarynyń sany - 300, emhanada qabyldaý - kúnine 1000 adamǵa deıin. 2004 jyly «Qazaqmys» korporasııasy men Fraıbýrg ýnıversıtettik klınıkasy arasynda medısına salasynda birlesip jumys atqarý týraly kelisimge qol qoıyldy. Onyń negizinde emdeý jáne qyzmet kórsetý salasynda eýropalyq standarttar engizilýde, birlesken jobalar júzege asyrylyp jatyr. Medısınalyq ortalyqtyń birqatar dárigeri Germanııada dárigerlik tájirıbeden ótýge ruqsat aldy.